Рөстәм Миңнеханов «Профессионаллар» һәм «Абилимпикс» чемпионатларында җиңүчеләрне котлады
“Профессионаллар” һәм “Абилимпикс” чемпионатлары җиңүчеләре, призерлары һәм остазлары белән Татарстан Республикасы Рәисе Р. Миңнеханов очрашты. Очрашу 187 нче күппрофильле лицейда узды (Казан, Н.Җиһанов ур.).
Рөстәм Миңнеханов уку сыйныфларын һәм лабораторияләрен карады, кайбер укыту программалары белән танышты. Уку йорты белән танышу барышында лицей директоры Гөлнара Галиева аңлатмалар бирде. ТР Рәисе инженер-технология сыйныфында булды, мобиль робототехника буенча мәйданчыкны карады, пилотсыз очу аппаратлары классының эше белән танышты. Рөстәм Миңнеханов шулай ук лицейның ИТ-полигонында булды.
Рөстәм Миңнеханов лицей укучылары - чемпионат призерлары белән аралашты һәм алар белән фотога төште. Аны ТР Премьер-министры урынбасары Ләйлә Фазлыева, ТР мәгариф һәм фән министры Илсур Һадиуллин һәм башкалар озата йөрде.
Лицейның актлар залында Рөстәм Миңнеханов 2024 елгы «Профессионаллар» һәм «Абилимпикс» чемпионатлары җиңүчеләре һәм призерлары белән очрашты. Барлык катнашучыларны сәламләп, Рөстәм Миңнеханов аларга максатчан булулары , үз-үзләренә һәм көчләренә ышанычлары өчен рәхмәт белдерде. “Без сезнең белән горурланабыз!” - диде ул, Татарстанны тәкъдим иткән һөнәри осталык буенча бөтенроссия конкурсларында җиңүчеләргә һәм лауреатларга мөрәҗәгать итеп.
ТР Рәисе үз чыгышында остазларга һәм тренерларга аерым рәхмәт сүзләре җиткерде.