Татарстанда 30 мәктәпкә заманча җиһазлар алу өчен грантлар бирелә

2025 елның 19 сентябре, җомга

Татарстанда яңа республика проекты - «Физик-химик алгарыш» старт алды. Аның буенча 60 мәктәп өчен грант ярдәме каралган. Бу хакта “Татар-информ”га ТР мәгариф һәм фән министры Илсур Һадиуллин хәбәр итте.

«Уку елы азагында 1 миллион сумлык грантларны югары казанышлары өчен 30 мәктәпкә бүлеп бирәчәкләр. Тагын 30 мәктәп заманча җиһазлар сатып алуга 2шәр  млн сум грант алачак. Бу республикадан бик җитди ярдәм чарасы», - диде ул.

Мәгариф һәм фән министрлыгы башлыгы конкурс нигезендә сайланачак 20 мәктәптә профильле сыйныфлар ачылачак, дип өстәде. Белем бирү оешмалары шулай ук физика һәм химия буенча китап комплектларын алачак, шул исәптән мәктәп китапханәләре  өчен дә.