2024/2025 уку елында ВПР уздыру нәтиҗәләре Бөтенроссия киңәшмәсендә каралды
Рособрнадзор һәм мәгариф сыйфатын бәяләү федераль институты узган уку елында бөтенроссия тикшерү эшләрен уздыру нәтиҗәләрен тикшерү өчен онлайн-очрашу уздырды. Киңәшмәдә мәгариф белән идарә итүнең төбәк һәм муниципаль органнары вәкилләре, мәктәп җитәкчеләре һәм методистлар катнашты.
"Белем бирү сыйфаты укытучыларны, ата-аналарны һәм бөтен җәмгыятьне борчый. Һәр мәктәпнең яхшы әзерлекле һәм тәрбияле укучыларны чыгаруы мөһим, алар укуын уңышлы дәвам итеп диплом алсыннар һәм традицион рухи-әхлакый кыйммәтләрне аерып торучы безнең илнең компетентлы белгечләре һәм лаеклы гражданнары булсыннар иде ", - диде Рособрнадзор җитәкчесе Анзор Музаев киңәшмәне ачып.
Ул билгеләп үткәнчә, Бөтенроссия тикшерү эшләре ел саен мәктәп укучыларын әзерләү дәрәҗәсе турында объектив күзаллау алу өчен уздырыла. Ун ел дәвамында бу процедура камилләшкән: предметлар исемлеге киңәйтелгән, катнашучылар саны арткан.
Белем бирү сыйфатын бәяләү федераль институты директоры Владимир Старичков киңәшмәдә катнашучыларга 2024/2025 уку елында ВПР нәтиҗәләренә җентекле анализ ясады. Ул шулай ук агымдагы уку елында бу эшләрне үткәрүдә төп үзгәрешләрне атады. Бөтенроссия тикшерү эшләрен уздыру сроклары үзгәртелде: алар 2026 елның 20 апреленнән 20 майга кадәр узачак. Һәр мәктәп, Рособрнадзор киңәшләрен һәм үзенең укыту графигын исәпкә алып, аларны уздыру даталарын мөстәкыйль рәвештә сайлый алачак. 6 һәм 7 сыйныфларда җәмгыять белеме ВПР үткәрү өчен предметлар исемлегеннән чыгарылган. 10 сыйныф өчен биология буенча тикшерү эше өстәлгән.