Рөстәм Миңнеханов Халыкара укытучылар көне уңаеннан оештырылган тантанада: Сезнең һөнәрегез - игелек, фидакарьлек һәм рухи юмартлык таләп итә торган хезмәт
Бүген Татарстан Республикасы Рәисе Рөстәм Миңнеханов Халыкара укытучылар көненә багышланган тантаналы чарада катнашучыларны сәламләде. Тантана Казанда, «Корстон» да узды һәм театральләштерелгән пролог белән ачылды.
Укытучыларны һөнәри бәйрәмнәре белән котлап, Рөстәм Миңнеханов рәхмәт сүзләрен белдерде. «Сезнең һөнәрегез - игелек, фидакарьлек һәм гаять зур рухи юмартлык таләп итә торган хезмәт, - диде ул. - Нәкъ менә сез балаларга үз-үзләренә ышанырга һәм тормышта үз юлын табарга ярдәм итәсез, һәр кешенең киләчәге төзелә торган белем һәм әхлакый кыйммәтләрнең ныклы нигезен саласыз".
Рөстәм Миңнеханов билгеләп үткәнчә, мәгариф системасын үстерү республикада абсолют өстенлек булды һәм булып кала. «Без уку һәм укыту өчен заманча һәм уңайлы шартлар тудыру буенча эзлекле эш алып барабыз: яңа мәктәпләр һәм бакчалар төзибез, матди-техник базаны яңартабыз, укытучыларга социаль ярдәм күрсәтүгә юнәлдерелгән инициативалар кертәбез», - диде ул.
Татарстан чираттагы тапкыр мәктәп укучыларының Бөтенроссия олимпиадасында җиңүчеләр саны буенча Россия мәгарифе лидерларының берсе статусын раслады.
" Кадерле дуслар! Бәйрәм белән котлап, сезгә сәламәтлек; имин тормыш; зур җиңүләр телим. Бәйрәм белән! Укытучылар көне белән!», - диде ТР Рәисе.
Аннары Татарстан Республикасы дәүләт бүләкләрен тапшыру булды.
Укытучыларны һөнәри бәйрәмнәре белән ТР мәгариф һәм фән министры Илсур Һадиуллин котлады.
Чара Татарстан Республикасы сәнгать осталары концерты белән дәвам итте.