Татарстан күп балалы гаиләләрдәге студентларның уку бәясенең 30 проценты компенсацияли

2025 елның 6 октябре, дүшәмбе

Татарстанда урта һөнәри белем бирү программалары буенча республиканың һөнәри белем бирү оешмаларында көндезге бүлектә укучы күп балалы гаиләләрдәге студентларның уку бәясенең 30 проценты компенсацияләнәчәк.

Республика Министрлар Кабинетының шул хактагы карарын ТР Премьер-министры Алексей Песошин имзалады.

Компенсация бирү эше ТР Хезмәт, халыкны эш белән тәэмин итү һәм социаль яклау министрлыгына йөкләнгән. ТР Дәүләт идарәсен цифрлы нигездә үстерү, мәгълүмат технологияләре һәм элемтә министрлыгы агымдагы елның 1 ноябренә кадәр «Татарстан Республикасы халкының социаль регистры» дәүләт мәгълүмат системасын эшләп бетерергә тиеш.

Карар, дәүләт мәгълүмат системасын эшләп бетерүгә кагылышлы пункттан тыш, 1 ноябрьдән үз көченә керә.