Татарстанда 14 ноябрьдә «Татарча диктант» узачак
Юбилей, унынчы «Татарча диктант» 14-16 ноябрь көннәрендә узачак. Конкурс турында тулырак мәгълүмат белән диктантны оештыручылар «Татар-информ» матбугат конференциясендә сөйләделәр.
Диктант өчен сайланган текстлар катлаулылык дәрәҗәсе буенча аерыла. Иң катлаулылары Татарстанда һәм Башкортстанда язылачак, ә иң җиңелләре - чит илләрдә. Узган елда диктантны латин хәрефләре белән язарга мөмкин иде, әмма быел эшләр бары тик кириллицада гына кабул ителәчәк.
Диктантны уздыру урыннары быел Россиянең 68 төбәгендә һәм 26 чит илдә билгеләнгән, шул исәптән БДБ илләре, Мисыр, Италия, Франция, Венгрия, Германия һәм башка илләрдә.
Татарстанда диктантны 14 ноябрьдә иртәнге 10 сәгатьтә язачаклар. Акциядә катнашу өчен төп мәйданчык - КФУның Филология һәм мәдәниятара коммуникацияләр институты конференц-залы булачак. Россиянең башка төбәкләрендә диктант 15 ноябрьдә, ә чит илләрдә - 16 ноябрьдә язачак.
Казанда текстларның дөреслеген ИФМК белгечләре тикшерәчәк, ә башка пунктлардан текстларны җирле оештыручылар тикшерәчәк. Тикшерүгә бер ай вакыт бирелә.
Акцияне оештыручылар - Бөтендөнья татар яшьләре форумы, Бөтендөнья татар конгрессы, ТР Яшьләр эшләре министрлыгы һәм башкалар.