КФУның IT-лицеенда яшь геологларның Бөтенроссия олимпиадасы призерларын бүләкләделәр
22 декабрьдә КФУның IT-лицеенда яшь геологларның XV Бөтенроссия ачык кыр олимпиадасы призерларын бүләкләү тантанасы булды.
24 июльдән 4 августка кадәр Пермь краеның Усть-Качка авылында узган ярышларда Татарстан Республикасын ике команда тәкъдим итте. Казаннан «Ферсман» командасы (СУНЦ - IT-лицей) Россиянең 29 төбәге арасында өченче урынны яулады, ә «Геобарс» командасы (Лениногорск, Әлмәт һәм Түбән Кама районнары укучылары) дүртенче урынны яуладылар.
Тантанада Татарстан Республикасы мәгариф һәм фән министры урынбасары Минзәлия Закирова чыгыш ясады. Ул укучыларның һөнәри үзбилгеләнеше өчен олимпиаданың әһәмиятен билгеләп үтте һәм «Татнефть» җәмгыятенә һәм кече нефть компанияләренә балалар-яшүсмерләр геологик хәрәкәтенә ярдәм иткән өчен рәхмәт белдерде. КФУ укытучыларына һәм мәктәп укытучыларына командаларны әзерләгән өчен аерым рәхмәт сүзләре яңгырады.