Казан укучылары «Киләчәк күге — балаларга!» фестивалендә дрон эшләнмәләрен тәкъдим иттеләр
Казанның Идел буе районындагы 35нче лицей — «Галактика» белем бирү үзәгендә пилотсыз спорт аппаратлары буенча «Киләчәк күге — балаларга!» шәһәр фестиваль-конкурсы узды. Анда 35, 83, 95, 116 һәм 185нче лицейлар, 39, 64, 68, 100 һәм 136нчы мәктәпләр, 6 һәм 179нчы гимназияләр укучылары, шулай ук КАИ техник көллияте студентлары һәм В.П. Чкалов исемендәге шәһәр балалар техник иҗат үзәгенә йөрүчеләр катнашты.
Катнашучылар белән Татарстан Дәүләт Советының Законлылык һәм хокук тәртибе комитеты рәисе урынбасары, «Куркынычсыз юллар» партия проектының иҗтимагый советы рәисе Ринат Фазылов, лицей директоры Елена Глухарева, «Аванти» компанияләр төркеме генераль директоры урынбасары Денис Волков һәм башкалар аралашты.
«Бердәм Россия»нең Халык программасы инженерлык белемен үстерүне, шул исәптән кадрлар әзерләүне модернизацияләүне, яшь тикшерүчеләргә ярдәм итүне һәм грантлар системасын киңәйтүне күздә тота. Партия инициативасы белән бу юнәлешләрне финанслау федераль бюджетта ныгытылган.