КФУда Лирид борынгы метеор агымының серләрен ачтылар
Физика институтының астрономия һәм космик геодезия кафедрасы профессоры, Казан федераль университетының В.П. Энгельгардт исемендәге Астрономия обсерваториясе фәнни җитәкчесе Юрий Нефедьев кешелек дөньясы инде өч мең елга якын күзәтә торган күк күренеше – Лирид метеор агымы турында сөйләде. Ул «атылучы йолдызларны» кайда, качан һәм ничек күреп булачагын аңлатты.
Казан университетында Кояш системасының кече җисемнәрен һәм, аерым алганда, Лирид метеор агымын фәнни тикшерүләр алып барыла. Физика институтының астрономия һәм космик геодезия кафедрасы доценты Мария Сергиенко метеор агымнарын һәм аларның «ата-ана» җисемнәрен өйрәнү белән турыдан-туры шөгыльләнә. Мондый тикшеренүләрнең мөһимлеге шунда: беренчедән, кометаларда Кояш системасының иң беренчел матдәсе сакланган һәм бу белемнәр эволюция теориясен төгәлләргә мөмкинлек бирә; икенчедән, мондый эшләр космик очышлар куркынычсызлыгын һәм планетабызны астероид-комета куркынычыннан саклау мәсьәләләрен хәл итәргә ярдәм итә.