Мәскәүдә «Минем туган ягымның җирле үзидарә тарихы» конкурсы җиңүчеләрен бүләкләделәр
21 апрельдә, Җирле үзидарә көнендә, Мәскәүдәге Союзлар йортының Колонналы залында X Бөтенроссия «Минем туган ягымның җирле үзидарә тарихы» конкурсы җиңүчеләрен бүләкләү тантанасы узды. Быел читтән торып үткәрелгән этапка Россиянең 87 төбәгеннән 2886 гариза килгән, ә көндезге этапка 1600 кеше узган. 630 укучы, студент һәм яшь белгеч җиңүче дип табылды.
Призлы урыннар яулаучылар арасында Азнакай районы вәкилләре дә бар. Беренче урынны Әдилә Әхмәдишина (фәнни җитәкчесе – Л.М. Әхмәдишина), икенче урынны Диләра Ибраһимова (фәнни җитәкчесе – Ч.Р. Ибраһимова), өченче урынны Сәлим Дәүләтшин (фәнни җитәкчесе – Г.А. Якупова) яулады.
Моннан тыш, Әдилә Әхмәдишина «Артек» халыкара балалар үзәгенә «Үсеш территориясе» махсуслаштырылган сменасына юллама белән бүләкләнгән сигез катнашучы арасына керде.
Җиңүчеләрне һәм аларның остазларын уңышлары белән котлыйбыз!