Казанда 2026 ел ахырында физик мөмкинлекләре чикле (ОВЗ) кешеләр өчен Россиядәге иң зур тернәкләндерү үзәге ачылачак
Быел Казанда илдәге иң зур тернәкләндерү үзәге төзелешен тәмамлау планлаштырыла. Ул күрү буенча инвалид һәм терәк-хәрәкәт аппараты авырулары булган кешеләргә ярдәм күрсәтәчәк.
Мәйданы 3,8 мең кв. метр булган савыктыру-тернәкләндерү үзәге «Ярдәм» комплексының бер өлеше булачак. Бу комплекска инде 2022 елда төзелгән «Дан» күпфункцияле инклюзив спорт комплексы һәм сукырларны һәм ишетү сәләте чикләнгән кешеләрне тернәкләндерү һәм укыту үзәге керә. 2013 елдан башлап анда Луи Брайль системасы буенча язу һәм укуга, компьютер грамоталыгына, төрле һөнәрләргә 22,7 меңнән артык кеше (сукырлар, саңгырау-телсезләр, коляскада йөрүчеләр, Даун синдромы, ДЦП булганнар һ.б.) өйрәтелгән. «Дан» спорт үзәгенең 1200 кв. метрлы ике катлы бинасында көн саен 500 кеше, шул исәптән паралимпиячеләр, спортның 15 төре (флорбол, бочча, футбол, мини-футбол, волейбол һәм баскетбол һ.б.) буенча күнегүләр ясый ала.
Тернәкләндерү үзәге шәхси хәйриячеләр ярдәме белән «Игелекле Казан» программасы кысаларында төзелә. Үзәк бинасында уку сыйныфлары, процедура бүлмәләре булган медицина блогы, гидравлик күтәрткечле махсус бассейн (25м*8,85м) һәм инвалидларны тернәкләндерү өчен башка бүлмәләр каралган.