Мамадышта студентлар 9 Майга ярты тонна авырлыкта алты метр озынлыкта самолет ясаганнар

2026 елның 24 апреле, җомга

Мамадыш политехника көллиятендә Җиңү көнен бәйрәм итүгә багышланган проектны гамәлгә ашыралар. Беренче курс студентлары, булачак эретеп ябыштыручылар, авырлыгы якынча 500 килограмм булган алты метрлы самолет моделе ясаганнар. Ул 9 Май көнне Совет урамында узачак бәйрәм парадының бер өлеше булачак.

Проектта катнашучылар билгеләп үткәнчә, бу корылма гади макет кына түгел: аның эчендә ике кеше утыра ала.

Проектның инициаторы — көллият директоры Айнур Әгләмов, ә техник яктан укытучы Рөстәм Салихов җитәкчелек иткән.

Хәзерге вакытта объект әзерлекнең соңгы этабын үтә — алда буяу һәм дизайн эшләре тора.

Парадта катнашканнан соң, самолетны истәлекле объект буларак уку йорты бинасы янына урнаштыру планлаштырыла.