Фәнни эшчәнлеккә тотылган чыгымнар елга 10 млрд. сум тәшкил итә – Энгель Фәттахов

Бүген ТР Фәннәр академиясендә Россия фәне көненә багышланган тантаналы җыелыш узды. Чарада ТР Дәүләт Советы Рәисе, сәясәт фәннәре докторы Фәрит Мөхәммәтшин, ТР Премьер-министры урынбасары – ТР мәгариф һәм фән министры Энгель Фәттахов, ТР Фәннәр академиясе президенты Әхмәт Мазһаров, Казан (Идел буе) федераль унивеситеты ректоры Илшат Гафуров, академиклар һәм яшь галимнәр катнашты.

Чараны Әхмәт Мазһаров ачып, республиканың Фәннәр академиясе структурасында 10 академия һәм 25 гамәли институт барлыгы турында искәртте. Аның фикеренчә, үзара эшчәнлек итү фәнни тикшеренүләрдә алга китүгә этәргеч булачак. Фән белән шөгыльләнүнең әһәмиятлелеген ассызыклап, җитәкче “Теләсә-кайсы җәмгыятьнең йөзен галимнәренең ирешкән уңышлары билгели”, - дип белдерде.

Фәрит Мөхәммәтшин үзенең чыгышында 90нчы елларда, Фәннәр академиясен төзү тәкъдимен ишеткәч, икеләнеп калуы хакында искә алды. Шулай да, рәис фикеренчә, академияне булдыру хакындагы карарны кабул итеп республика җитәкчелеге дөрес эшләгән. “Егерме ел эчендә, Татарстанны хәзерге вакытта ул нинди – шундый рәвешкә кертү өчен сез күп эш эшләдегез. Күп кенә икътисади тармаклар сезнең актив булуыгыз нәтиҗәсендә үсә һәм көндәшлеккә сәләтле тармакка әверелә”, - дип ассызыклап үтте ул.

Аның фикеренчә, нәкъ менә фән эшлеклеләре һәм галимнәр биргән киңәшләргә таянып, нефть запасларын сакчыл тоту нәтиҗәсендә, елына 20-22 млн. тонна чыгарып, әле тагын 20-25 ел буе нефть табарга мөмкинлек бар.

Моннан тыш, Ф. Мөхәммәтшин, татар халкының һәм башка халыкларның тарихи тамырларын өйрәнгән, тикшергән, шулар га багышлап китаплар чыгарган өчен, тантанада катнашучыларга рәхмәт сүзләре җиткерде. Шулай ук рәис, Фәннәр академиясе вәкилләреннән милләтара сорауларга җаваплар табып, республика җитәкчелегенә идарә итүдә дөрес карарлар кабул итүдә ярдәм сорады.

Энгель Фәттахов исә республикада фәнни оешмаларның бертуктаусыз арта баруына басым ясады. Бу – 120гә якын академия, югары уку йортлары, тармак учреждениеләре. Татарстанда фән тармагында, даими рәвештә, 14 мең кеше эшли. “Соңгы вакытта фәнни эшчәнлеккә тотылган чыгымнарның күләме артты һәм ул елга 10 млрд. сум тәшкил итә”, - дип белдерде министр.

Быелга максат-бурычлар билгеләп, Э. Фәттахов фәннең академик секторын модернизацияләү буенча эшчәнлек алып барырга һәм бу өлкәдә туган кайбер мәсьәләләрне чишәргә кирәк булуын әйтте.

Чара дәвамында ТР Фәннәр академиясе әгъзаларын һәм династияләрен, яшь галимнәрне, фән өлкәсендәге хезмәтләре өчен, бүләкләделәр.