Укучылар өчен күренекле мәгърифәтче, галим Ибраһим Хәлфин исемендәге IX Республика фәнни-эзләнү укучылар конференциясе үткәрелде

Татарстан Республикасы мәгариф һәм фән министрлыгы планы нигезендә телләр укытуны камилләштерү, белем бирүнең сыйфатын күтәрү, сәләтле укучыларны барлау, укучыларда фәнни-тикшеренү күнекмәләре формалаштыру максатыннан 2014 нче елның 8 нче февралендә Казан шәһәренең 14 нче гимназиясендә укучылар өчен күренекле мәгърифәтче, галим Ибраһим Хәлфин исемендәге IX Республика фәнни-эзләнү укучылар конференциясе үткәрелде. Конференция «Хәлфиннәр нәселе язмышында – милләт тарихы” дигән әдәби- музыкаль композиция белән башланып китте. Конференциядә Казан (Идел буе) федераль университетының филология һәм мәдәниятара багланышлар институты, Казан дәүләт медицина университеты, Г.Ибраһимов исемендәге тел, әдәбият һәм сәнгать институты, Мәгарифне үстерү институты, Татарстан Республикасының язучылар берлеге әгъзалары, “Казан утлары” һәм “Чын мирас” журналы хезмәткәрләре, мәгълүмати-методик үзәк белгечләре һәм укытучылар катнашында 9 секциядә республиканың 34 районы һәм Казан шәһәренең 4-11 нче сыйныф укучыларының икенче турга узган 241 (барысы-665 эш тәкъдим ителде) эзләнү эше тыңланды.
Ел саен әдәбият, сәнгать һәм мәгариф өлкәсендә тирән эз калдырган бер татар зыялысының тормыш юлы һәм иҗатын тирәнтен өйрәнгән, конференциянең бизәге булган, “Дөнья цивилизациясе контекстында милли сәнгать” секциясе быел күренекле композитор Рөстәм Яхинның тормыш юлы һәм иҗатына багышланды. Укучылар арасында композитор тормышына һәм иҗатына багышланган иң яхшы компьютер презентациясен Казан шәһәренең 175 нче мәктәп укучысы Шәрәфетдинова Рүфинә яклады, ә укытучылар өчен дәрес һәм дәрестән тыш чараларның эшкәртмәләре бәйгесе җиңүчесе Актаныш районы Чалманарат мәктәбе укытучысы Әлфия Рафаел кызы Исрафилова булды.
Конференциядә катнашкан укучылар зур тәҗрибә туплап, яңа белемнәр җыеп, киләчәк эзләнүләргә этәргеч алып, булачак конференцияләрдә дә актив катнашу теләге белән яңа дуслар табып таралыштылар.