“IT-чемпион” – яуланмаган үрләр алда әле

Татарстан җитәкчелеге үз алдына әнә шундый бурычлар куя. Әлеге максатны тормышка ашырырга исә соңгы елда республикада гына түгел, ә россиякүләм дәрәҗәдә зур танылу алган “IT-чемпион” бәйгесе ярдәм итәчәк.
Конкурс узган елның март аенда игълан ителеп, 2013 ел азагына тулысынча тәмамланырга тиеш иде. Максаты – мәктәп укучылары ярдәмендә республикада электрон хезмәтләр порталыннан файдаланучылар санын арттыру булды. Конкурс нәтиҗәләре исә халыкны гына түгел, ә республика җитәкчеләрен дә таң калдырды. Бәйгедә барлыгы 253 мең укучы катнашты. Алар якынча 320 меңнән артык өлкән буын вәкилен республиканың электрон хезмәтләреннән файдаланырга өйрәтте. Конкурс ярдәмендә республикада электрон рәвештә күрсәтелә торган хезмәтләр саны 60 процентка артты, ә порталдагы шәхси кабинетлар саны исә ике тапкырга күбәйде.
Нәтиҗәдә, моннан якынча бер ел элек “IT-чемпион” бәйгесенә башлангыч биргән Татарстан Президенты Рөстәм Миңнеханов әлеге конкурсны 2014 елда да дәвам иттерергә кирәк, дигән карар кабул итте. Әйтергә кирәк, быелгы бәйгене уздыру кагыйдәләре узган ел белән чагыштырганда шактый аерыла.

iPad урынына – ноутбуклар

Беренче аерма – быел “IT-чемпион” бәйгесе ике этапта гына уздырылачак. Ул 15 мартта башланып китәр һәм ел азагына кадәр дәвам итәр дип уйланыла. Конкурсның беренче өлешенә нәтиҗәләр “Соңгы кыңгырау” бәйрәме алдыннан, ягъни май азакларында ясалачак. Ә инде икенче этапның җиңүчеләре агымдагы елның декабрь ахырында билгеле булырга тиеш.
Быелгы бәйге җиңүчеләренә узган елдагы кебек iPad лар түгел, ә яхшы ноутбуклар тапшырылачак. Татарстанның мәгариф һәм фән министры урынбасары Андрей Поминов сүзләренә караганда, бу – конкурста узган елда җиңү яулаган мәктәп укучылары да катнаша алсын өчен эшләнә. Чара кысаларында барлыгы 306 мәктәп укучысын ноутбуклы итү каралган.
Быелгы бәйгенең тагын бер мөһим үзенчәлеге - “Татарстанның дәүләт һәм муниципаль хезмәтләр порталын камилләштерү” темасына багышланган иҗади бәйге урынына “Иң актив мәктәп” номинациясе өстәлә. Бу, беренче чиратта, халык арасында электрон хезмәтләр порталын популярлаштыру эшчәнлегенә ата-аналарны гына түгел, ә укытучыларны да тарту максатын күздә тота. Җиңүче дип табылган мәктәпләр исә интерактив җиһазлар комплекты һәм мобиль сыйныфлар белән бүләкләнәчәк.
- Конкурсның бу өлешенә нәтиҗәләр ел ахырында ясалачак. Кайсы мәктәпнең җиңү яулаганын билгеләү исә бер дә авыр булмаячак. Моның өчен шул мәктәптә белем алучы укучылар тарафыннан җыелган баллар санын ачыклау да җитә. Димәк, балалар никадәр активрак булса, мәктәпнең җиңүгә өмете дә шулкадәр югарырак булачак, - дип белдерде Андрей Поминов.

“IT-чемпион” бәйгесендә мәктәпләр дә ярыша

Татарстанның мәгълүматлаштыру һәм элемтә министры Роман Шәйхетдинов сүзләренә караганда, бу шактый кызык номинация.
- Номинацияне өстәү идеясен Татарстанның мәгариф һәм фән министры Энгель Фәттахов җиткерде. Бу – укучыларның конкурста ни дәрәҗәдә актив катнашуы белән ата-аналар гына түгел, ә мөгаллимнәр дә кызыксынып торачак, дигән сүз. Чөнки яңа инновацион җиһазлар оту мөмкинлеге адым саен чыгып тормый. Нәтиҗәдә, республика мәктәпләре арасында намуслы көндәшлек барлыкка килә. Миңа калса, бу шактый уңай күренеш, - дип саный министр.
“IT-чемпион” бәйгесендә җиңү яулаган мәктәпләр саны шактый күп булачак. Андрей Поминов сүзләренә караганда, иң актив белем бирү учреждениеләре Татарстанның һәрбер районында ачыкланырга тиеш. Шулар арасынннан иң күп балл җыйган өч мәктәп абсолют җиңүче булып танылачак. Нәкъ менә алар югары технологияле уку-укыту җиһазларына ия булачак та инде.

Беренче урында ноутбук түгел, мәктәп

“IT-чемпион” бәйгесе өр-яңадан игълан ителү турында ишеткәч тә, без шушы конкурсның беренче этабында җиңү яулаган Чүпрәле районының Яңа Кәкреле авылы егете Айваз Закиров белән элемтәгә кердек.
- Бу бәйге алга таба да дәвам итәр дип өметләнгән идем – хыялым чынга ашты. Беренче урынга ноутбук бирүләрен белгәч, тагын да сөендем. Һичшиксез катнашып, ноутбук җиңәргә тырышып карячакмын, - дип уй-фикерләре белән уртаклашты егет.
Ә инде яңа конкурсның мәктәпләр арасында да уздырылуын белгәч, беренче чиратта, мәктәбен иң алдынгы урынга чыгарырга тырышачагын белдерде ул.
- Минем iPad бар бит инде. Мәктәбебез дә югары сыйфатлы интерактив җиһазлар белән тәэмин ителсә, бик яхшы булыр иде, - ди Айваз Закиров.
P.S. 2014 елда Татарстанның электрон хезмәтләр порталын популярлаштыруга зур өлеш керткән укучы һәм мәктәпләргә “IT-чемпион” бәйгесе кысаларында 306 ноутбук, 51 комплект интерактив җиһаз, 3 мобиль сыйныф һәм 2 меңнән артык истәлекле бүләкләр тапшыру каралган.