Укучылар наркотикларга “юк” дияргә өйрәнә

Наркотиклар тозагына эләкмәс өчен нинди сыйфатларга ия булырга кирәк? Балаларны телевизордан даими күрсәтелә торган криминал һәм башка куркыныч кадрлардан саклау юллары нинди? Бу сорауга бүген мәктәп укучылары һәм белгечләр бергәләп җавап эзләде.
“Белергә хокукым бар!” дәресенең төп максаты – мәктәп укучыларына наркотикларның зыяны турында аңлату, аларны начар кешене яхшысыннан аерырга өйрәтү булды. Ә укытучылар һәм балигъ булмаганнарны яклау буенча комиссия вәкилләре исә бу проблема белән бәйле көнүзәк мәсьәләләр турында фикер алышты.
Чарада Татарстан мәгариф һәм фән министры урынбасары Светлана Гиниатуллина, республикада наркотиклар әйләнешен контрольдә тоту идарәсе җитәкчесе урынбасары Эдуард Гәрәев, Сәламәтлек саклау министрлыгына караган наркологик дипансерның баш табиб урынбасары Степан Криницкий да катнашты.
Наркотиклар зыяныннан кала, чарада яшүсмерләрне тискәре мәгълүматтан саклау юллары, интернет-бәйлелекне кисәтү турында да сөйләштеләр. Белгечләрне керем начар булган һәм имин булмаган гаиләләрдә тәрбияләнүче балалар язмышы да кызыксындырды.