Чаллының 85 мөгаллиме Россия Президентының 200 мең сумлык грантына дәгъва кыла

Чаллы шәһәренең 85 педагогы Россиянең иң яхшы укытучылары бәйгесендә катнашырга ниятли.
Алар иҗтимагый тыңлаулар узган һәм үзләренең эш тәҗрибәсе белән таныштырган инде. Тиздән дәгъвачыларның документларын Татарстан Мәгариф һәм фән министрлыгына җибәрәчәкләр, анда кандидатураларны тикшергәннән соң, рейтинг төзеләчәк.
Россия Мәгариф һәм фән министрлыгына җиңүчеләрнең исемлеген июнь аенда җибәрү күздә тотыла. Бәйгедә мөгаллимнәрнең һөнәри осталыгына, эштә заманча белем бирү технологияләрен куллануына бәя бирелә, үзләренең методик системасы бармы-юкмы икәнлеге дә исәпкә алына.
Конкурс нәтиҗәләре буенча Татарстанда барлыгы 26 укытучы Россия Президентының 200 мең сум күләмендәге премиясенә лаек булачак.
Узган ел Чаллының 61нче гимназиясе иехнология укытучысы Олег Демидов җиңүчеләр исемлегенә кергән иде.
Акчалата премияләр күркәм гадәткә кергәнчә Укытучылар көнен тапшырылачак. Шулай ук бәйге нәтиҗәләре буенча югары нәтиҗәләр күрсәткән, әмма Бөтенроссия конкурсының җиңүчеләре арасына кермәгән мөгаллимнәр дә бүләксез калмаячак. Аларны 25-100 мең сум күләмендәге акчалата премияләр көтә. Узган ел Чаллыда 11 педагог әлеге бүләккә лаек булды.