БДИга психологик яктан әзер бул!

Мәгариф һәм фән өлкәсенә Күзәтчелек итү буенча федераль хезмәт (Рособрнадзор) 2014 елгы БДИ буенча брошюралар-тәкъдимнәр әзерләде.
Бердәм дәүләт имтиханын уздыруның көнүзәк мәсьәләләрен үз эченә алган әлеге брошюралар-тәкъдимнәр быел мәктәп тәмамлаучылар, укытучылар һәм ата-аналар өчен эшләнгән. Аерым алганда, аларның мәктәп тәмамлаучылар өчен каралганында укучыларның имтиханда үз-үзен тоту, имтихан материаллары белән эшләү кагыйдәләре, БДИда өстәмә материаллар куллану мәсьәләләре, апелляция бирү буенча мөһим мәгълүмат, шулай ук үз-үзеңне кулда тоту өчен, психотехник күнегүләр тупланган.
Ата-аналар өчен эшләнгән брошюра үз эченә баланы имтиханга психологик яктан әзерләү һәм гаиләнең аңа теләктәшлек белдерү, имтиханга әзерләнгәндә укучыларның оешканлыгын булдыру өчен тәкъдимнәр, һөнәр сайлау буенча киңәшләрне ала.
Укытучылар өчен эшләнгән брошюра, иң беренче чиратта, укучылары тәүге тапкыр бердәм имтихан тапшыручы педагогларга адресланган. Монда балаларны БДИга психологик яктан һәм гомумән әзерләү юнәлешендәге киңәшләр, бу өлкәдәге педагогик тәҗрибә, һөнәр сайлау буенча тестлар бар.
Брошюраларның әзер макетлары бердәм дәүләт имтиханының рәсми мәгълүмат порталында урнаштырылган һәм мәгариф идарәләре, массакүләм мәгълүмат чаралары тарафыннан укучыларга, ата-аналарга, педагогларга һәм белем бирү учреждениеләре җитәкчеләренә мәгълүмат бирү өчен файдаланыла ала.
Шулай ук бу елдагы бердәм имтихан үзенчәлекләре турындагы мәгълүмат белән тәэмин итү өчен, видеороликлар һәм күрсәтмә материаллар әзерләнгән. Аларны бердәм дәүләт имтиханының www.ege.edu.ru адересы буенча урнашкан рәсми мәгълүмат порталында «Видео», «Информационные материалы» бүлекләрендә табарга мөмкин. Шулай ук мәгариф һәм фән өлкәсенә Күзәтчелек итү буенча федераль хезмәтнең (Рособрнадзор) YouTube челтәрендәге www.youtube.com/user/RosObrNadzor адресы буенча урнашкан каналында да мәгълүмат туплап бирелгән.