“Мәгариф. Карьера” дип аталган XIV махсуслашкан күргәзмә

Бүген, 2 апрель көнне, “Казан ярминкәсе” күргәзмәләр үзәгендә “Мәгариф. Карьера” дип аталган XIV махсуслашкан күргәзмә үзенең эшен башлады.
Күргәзмәгә 70тән артык катнашучы җыелды. Алар арасында мәгарифнең төрле өлкәләренә караган уку йортлары, мәгариф үзәкләре, халыкны эш белән тәэмин итү үзәкләре, кадрлар агентлыклары, сәнәгать предприятияләре, банклар һәм башка оешмалар бар.
Күргәзмәдә мәгариф һәм хезмәт базарының бөтен төп юнәлешләре, яшьләрдә Казан шәһәре генә түгел, ә Россиянең башка шәһәрләрендәге, шул исәптән чит илләрдәге уку йортлары турында тулы күзаллау тудырырга ярдәм иткән мәгълүмат тәкъдим ителгән.
Татарстан Республикасы Мәгариф һәм фән министрлыгы тарафыннан күргәзмәдә катнашучыларга “Бердәм дәүләт имтиханы, Бердәм республика имтиханы һәм Төп дәүләт имтиханнары буенча репетицион тестлар” дип исемләнгән экспозиция тәкъдим ителде. Экспозициядә компьютер үзәге булдырылган. Биредә мәктәпләрнең чыгарылыш сыйныф укучылары БДИ формасы буенча сынау имтиханында (пробный ЕГЭ) үзләрен сынап карарга мөмкин. Күргәзмә үз эшен түбәндәге график буенча дәвам итәчәк: 2-3 апрельдә 10.00 сәг-тән 17.00 сәг-кә кадәр, 4 апрельдә 10.00 сәг-тән 14.00 сәг-кә кадәр.