Медведев Татарстанга балалар бакчалары төзелешенә 900 млн. сумнан артык акча бүлеп биргән

2014 елгы федераль бюджетта төбәкләрдә мәктәпкәчә мәгариф системасын модернизацияләүгә 40 млрд. сум күләмендә акча каралган.
Бу хактагы карарны РФ Премьер-министры Дмитрий Медведев имзалаган. Документ тексты бүген Министрлар Кабинеты сайтында дөнья күрде.
84 субъект бюджетларына субсидия күчереләчәк, анда Кырым Республикасы (577,9 млн. сум) һәм Севастополь (104 млн. сум) да бар. Документ буенча Татарстан 938 млн. сум алачак.
Субсидияләр 2013-2020 елларга исәпләнгән “Мәгарифне үстерү” дәүләт программасы кысаларында билгеләнә. Төбәкләр чаралары планында 2014 елда балалар бакчаларында 400 мең чамасы урын булдыру каралган.
“Кабул ителгән карар 3 яшьтән 7 яшькәчә балалар өчен мәктәпкәчә учреждениеләрдә 100 процент урын булдыруга юнәлдерелгән”, - дип белдерелә хәбәрдә.