Сәләтлеләрне бергә туплыйлар

Соңгы елларда Татарстанда сәләтле балалар белән эшли торган лицей-интернатлар челтәре булдыру юнәлешендә актив эшлиләр. Бүгенге көндә республикабызда малай-кызларның табигать тарафыннан бирелгән талантын үстереп, аларны иҗади шәхес итеп тәрбияләү бурычын куйган 16 махсус мәктәп эшли.
Талантлы балалар, яшьләрне ачыклау һәм үстерү эше Татарстан мәгариф сәясәтенең өстенлекле юнәлеше булып тора. Республикабыз Идел буе федераль округында сәләтле балаларга теләктәшлек итү чараларын финанслау буенча лидерлар рәтендә. Быел, әйтик, әлеге юнәлеш өчен 30 миллион сумнан артык акча каралган. Алдагы еллар белән чагыштырганда бу өч тапкыр күбрәк.
- Сәләтле балалар белән эшләү бик мөһим. Бу яшьләр безнең икътисадны, сәнгатьне, фәнне алга алып барачак, – дип саный Татарстан Дәүләт Советының Мәдәният, фән, мәгариф һәм милли мәсьәләләр комитеты рәисе Разил Вәлиев.
Сәләтле, интеллектуаль яктан көчле балалар белән эшләүдә үзара көндәшлекне арттыру зарур. Шуңа да яшьләрне бер урынга җыеп укыту бик тә отышлы санала. Бүген интернат тибындагы уку йортлары шәһәрләрдә генә түгел, районнарда да ачыла. Республикада талантлы балаларны туплаган 16 уку йортының тугызында тәрбия һәм укыту эшләре татар, рус, инглиз телләрендә башкарыла. Шуларның бишесе башкалабызда урнашкан.
Әйтик, Казанның IT-лицей – табигый-фәнни предметларны тирәнтен өйрәтүче махсуслашкан мәктәптә укучылар микросхемалар һәм зур булмаган роботлар җыялар, программалаштыру телләрен өйрәнәләр, 3D технологияләр белән шөгыльләнәләр. 7-9 сыйныф укучылары арасында өй җыештыручы робот җыйган, трассаларны яктыртканда электр энергиясен сак тоту программаларын эшләүчеләр бар икән. Алар уйлап тапкан технологияләрнең кайберләре инде кулланышка кертү стадиясендә.
Республикабызда сәләтле балалар өчен лицей-интернатлар челтәрен алга таба да үстерергә ниятлиләр. Казан илкүләм тикшеренүләр техник университет (КАИ) каршында инженерлар әзерли торган лицей-интернат ачырга ниятлиләр. Шулай ук татар гимназия-интернаты төзү тәкъдимнәре дә бар. Моннан кала Казанда олимпиадаларга әзерләүче махсус үзәк тә булдырмакчылар.