Алабуга районының Морт авылы балалар бакчасында өстәмә төркем ачылды

Быелның гыйнвар аенда узган түгәрәк өстәл утырышында авылда яшәүчеләр район башлыгы Геннадий Емельяновка бакчада тагын бер төркем кирәклеге турында үтенеч белән мөрәҗәгать иткән иде.
- Ел башында балалар бакчасында 10 урынга исәпләнгән бер төркем эшләде, - ди Алабуга районы мәгариф идарәсенең мәктәпкәчә белем бирү бүлеге башлыгы Татьяна Исламова. - Шул ук вакытта бакчага 20 сабый йөрде. Морт авылында халыкның ишәюе, шул исәптән мәктәпкәчә яшьтәге балаларның артуына бәйле рәвештә, «Электрон балалар бакчасы» системасында чират хасил булды. Ата-аналар район башлыгына мөрәҗәгать иткәч, Геннадий Емельянов ремонт эшләре үткәрү, җиһазлар сатып алу һәм башка ихтыяҗлар өчен мөмкинлекләр табарга күрсәтмә бирде.
Муниципаль бюджет хисабына балалар бакчасында өч ай эчендә ремонт ясадылар, электр үткәргечләрен, торбаларны алыштырдылар, өч катлы караватлар, урын-җир әйберләре, кием-салым өчен шкафлар, өстәл һәм урындыклар сатып алдылар.
Өстәмә төркем ачылганнан соң, бакча 30 баланы кабул итә башлады.