Чаллыда 6 меңнән артык беренче сыйныф укучысына ярдәм күрсәтелгән

“Мәктәпкә әзерләнергә ярдәм ит” акциясе кысаларында Яр Чаллыда 5 мең 663 беренче сыйныф укучысы һәм 695 аз керемле гаиләләрдән булган балага ярдәм күрсәтелгән. Бу хакта бүген эшлекле дүшәмбедә Башкарма комитет җитәкчесе урынбасары Рамил Хәлимов белдерде.
“Мәктәпкә әзерләнергә ярдәм ит” хәйрия акциясе Яр Чаллыда ул 15 майда ук башланды. Өч ай дәвамында акциядә шәһәрнең белем бирү учреждениеләре, тимурчылар отрядлары, җәмәгать оешмалары катнашты. Балалар бакчаларында чыгарылыш кичәләре вакытында булачак беренче сыйныф укучыларына 5 мең 418 портфель тапшырылды. Шулай ук мәктәп букчалары 245 балалар бакчаларына йөрмәүче беренче сыйныф укучысы, 172 күп балалы гаиләдә тәрбияләнүче һәм 53 Украинадан күчеп килгән балага бүләк ителде. Агымдагы елда “Мәктәпкә әзерләнергә ярдәм ит” акциясе кысаларында шәһәр бюджетыннан 817 мең сум акча бүленде.