Татарстанның 45 районында 319 мәктәп янында спорт мәйданчыгы төзиләр

Яңа-Савин районының 165 нче мәктәбе территориясендә чираттагы күпфункцияле спорт мәйданы ачылышы тантанасы узды.
Теләгән һәркем физик тәрбия белән шөгыльләнә алырлык универсиаль спорт мәйданы бүген шулай ук Идел буе районының 129 нчы мәктәбе территориясендә дә ачылды.
Балалр һәм яшьләрнең ялын, мәшгульлеген һәм сәламәтләндерүне оештыру буенча ведомствоара республика комиссиясе рәисе урынбасары Андрей Кондратьев билгеләп үткәнчә, Татарстан күпсанлы сынау проектларын гамәлгә ашыру буенча уникаль төбәк. Аларның иң әһәмиятлесе – спорт мәйданнары төзелеше һәм “Бердәм Россия” партиясенең “Дворовый тренер” федераль проекты, аның кысаларында 120 остаз яшәү урыны буенча балалар белән эшли.
“Киләчәктә без мондый мәйданнарны шәһәрдән читтәге балалар лагерьларында да урнаштырырга ниятлибез. Без барлык балаларның да спорт йолдызлары булмаячагын яхшы аңлыйбыз, тик аларның спортка кызыксынуы артуында, буш вакытлары файдага узачагында шигебез юк”, - дип билгеләп үтте ул.
Спорт мәйданчыкларын ачу эше “Бердәм Россия” партиясенең республика бүлеге инициативасы буенча, Татарстан Хөкүмәте фәрманы белән бөтен республика буенча алып барыла. Барлык мәйданнарга да керүнең ирекле булуы, теләгән һәркемнең бушлай күңеленә якын спорт төре белән шөгыльләнә алуы мөһим.
Быел Татарстанда инде 110 нан артык спорт мәйданчыгы төзелгән. Ел азагына кадәр Татарстанның 45 районында мондый 319 мәйданчык ачылачак.