1 нче сентябрьдә Татарстанда 7 гомуми белем бирү учреждениесе ачыла

Яңа уку елында Татарстанда 7 яңа урта белем бирү учреждениесе ачылачак. Бу хакта бүген, ТР Премьер-министрының беренче урынбасары Алексей Песошин җитәкчелегендә үткән җыелышта ТР мәгариф һәм фән министры урынбасары Светлана Гыйниятуллина хәбәр итте.
1 сентябрьдә Татарстан Республикасы территориясендә 1477 гомуми белем бирү учреждениесе үз ишекләрен ача. Шулай ук бу көнне республикада яңа 7 гомуми белем бирүче учреждениесе эшли башлый. Берничә мәктәп исә әле хаман да лицензия ала алмаган. Моның сәбәбе — мәктәпләрнең Россия кулланучылар хокукларын яклау өлкәсендә күзәтчелек хезмәте таләпләренә туры килмәү.
Шулай ук, Светлана Гыйниятуллина хәбәр иткәнчә, гомуми белем бирү учреждениеләрендә төзекләндерү эшләре төгәлләнеп килә. Хәзерге вакытта төзекләндерү эшләренең 94 проценты башкарылган. РТ мәгариф һәм фән министры урынбасары әйтеп үткәнчә, бу эшләр 25 нче августка кадәр төгәлләнергә тиеш.
Мәктәпләрдә террорчылыкка каршы әзерлек эшләре үткәрелгән, һәм террорчылыкка каршы системалар урнаштырылган. Дөрес, белем бирү учреждениеләренең әлегә 7 процентында гына шундый җиһазлар бар.
Дәреслекләр алырга бюджеттан 320 миллион сум акча бүлеп бирелгән. Аларга 700 меңнән артык дәреслек сатып алынганы хакында хәбәр итте ТР мәгариф һәм фән министры урынбасары. Дәреслекләр 25 нче августка кадәр булдырылачак.