Германия заводы Чаллы училищесын үз җиһазлары белән тәмин итә

Ел ахырына кадәр Германиянең Hettich заводы Чаллының 114нче училищесын үз җиһазлары һәм фурнитура белән бушлай тәэмин итәчәк. Быел әлеге уку йортына беренче тапкыр йорт җиһазлары ясаучы белгечләр әзерләү өчен 24 студенттан торган төркем җыйдылар.



Мондый килешүгә мебель җитештерү белән шөгыльләнүче автокала эшкуарларының Германиягә сәфәре вакытында ирешелде. Чаллы шәһәре һәм “Чулман аръягы» төбәге Сәүдә-сәнәгать палатасы генераль директоры Иван Шигин сүзләренә караганда, кадрлар әзерләү системасы җайга салынган. Белгечләрне үз җиһазларында өйрәтәләр. Чаллы эшкуарлары Hettich компаниясенең дилерлары булачагын күздә тотып, автокала кадрларын чит ил җиһазлары һәм фурнитурасында өйрәтергә карар кылганнар. Өстәвенә, немецлар фурнитура белән ел саен тәэмин итеп торырга ышандыра. Шунысы кызганыч, студентларны өйрәтү өчен шәһәрдә хәтта оста да таба алмаганнар, әлегә эшкуар Михаил Муравьев педагог-остаз вазифасын үтәячәк. Яңа елдан соң Чаллыда Германиядән йорт җиһазлары ясаучылар делегациясен көтәләр.