Мәскәүдә Каюм Насыйри исемендәге институтның белем бирү-мәдәни үзәге ачыла

17 декабрь көнне Мәскәүдә Каюм Насыйри исемендәге институтның белем бирү-мәдәни үзәге ачылачак. Үзәк Муса Җәлил исемендәге татар компонентлы этномәдәни юнәлештә эшләүче 1186нчы мәктәп базасында оеша. Ачылыш тантанасында Татарстан Дәүләт Советы рәисе Фәрит Мөхәммәтшин, республика премьер-министры урынбасары - мәгариф һәм фән министры Энгель Фәттахов, Татарстан Дәүләт Советының мәгариф, мәдәният, фән һәм милли мәсьәләләр комитеты рәисе Разил Вәлиев һәм Татарстанның башка рәсми вәкилләре, шулай ук Мәскәү шәһәре хөкүмәте вәкилләре катнашыр дип көтелә.
Каюма Насыйри исемендәге институт КФУның Филология һәм мәдәниятара багланышлар институты каршында төзелгән иде. КФУның Филология һәм мәдәниятара багланышлар институты каршындагы Каюм Насыйри институты татар телен таныту, аңа өйрәтү өчен дөньяда үзенең үзәкләрен булдырачак. Аның беренчесе нәкъ менә Мәскәүдә ачылачак та инде, ди проект авторлары.
Мәскәүнең 1186нчы мәктәбенең материаль-техник базасы белән, кабинет һәм заллары, китапханә һәм музее белән танышканнан соң Рәдиф Җамалетдинов Каюм Насыйри исемендәге институтның бер үзәген нәкъ биредә ачарга кирәк дигән фикергә килгән. Әлеге мәктәптә педагоглар төркеме дә көчле, ди ул. Мәктәптә үзәк өчен аерым бүлмә дә биреләчәк.
Институт белем-мәдәни үзәген мөһим җиһазлар һәм дәреслекләр, энциклопедия, сүзлекләр белән тәэмин итүне максат итеп куя. Үзәктә татар телен өйрәнү буенча бушлай курслар оештырыла. Казаннан килгән педагоглар татар әдәбияты буенча фәнни конференцияләр дә үткәрәчәк, ди проект авторлары.
Институт юкка гына Каюм Насыйри исеме алмаган. Танылган татар мәгърифәтчесе, фикер иясе, этнограф-галим, тел белгече, язучы, педагог гомер буе рус белән татар мәдәниятен якынайтуга омтылган.