Казанда Татарстан Республикасының сәләтле яшьләрен бүләкләделәр

Бүген, 25 декабрьдә Казанда, Татарстан Республика Премьер-министры урынбасары – мәгариф һәм фән министры Энгель Фәттахов катнашында, сәләтле яшьләрне бүләкләү тантанасы узды. РФ Президенты премиясе лауреатларының гомуми күләме быел 164 кешене тәшкил итә. Премия биш номинация буенча түбәндәгечә билгеләнде:
- социаль-әһәмиятле һәм җәмәгатьчелек эшчәнлеге – 11 кеше;
- фәнни-техник иҗат, уку-тикшеренү эшчәнлеге – 112 кеше;
- һөнәри осталык – 6 кеше;
- сәнгати иҗат – 17 кеше;
- һәвәскәр спорт – 18 кеше.
Әлеге студентларның кайберләре Татарстан Республикасы Президенты стипендиатлары булып тора. Алар – КФУның А.М.Бутлеров исемендәге химия институты студентлары Руслан Андрианов, Алмаз Әхтәмов һәм Михаил Ягофаров, КФУның фундаменталь медицина һәм биология институты студенты Марат Зайнуллин, Идел буе дәүләт физик культура, спорт һәм туризм академиясе спорт факультеты студенты Иван Клименко, КФУның филология һәм милләтара багланышлар институты студенты Гүзәл Хәмидуллина. Халыкара һәм бөтенроссия олимпиадаларда җиңүчеләр федераль бюджеттан 60 мең, бөтенроссия олимпиадалары призерлары һәм төбәк олимпиадаларында җиңүчеләр 30 мең күләмендәге премия белән бүләкләнде.