Быел Казанда яңа 30 балалар бакчасы төзелгән, киләсе елда 20не салу ниятләнә

Быел Казанда, төбәкләрдә мәктәпкәчә белем бирү системасын үстерү һәм бакчаларга урнашу чиратларын бетерүдә “юл картасы” чараларын гамәлгә ашыру кысаларында, 30 балалар бакчасы төзелгән (2се былтыргыдан төзелеп бетми калган булган), шуларның 7се – Вознесенское, Залесный, Кадышево, Малые Клыки, Отары, Петровский, Привольный бистәләрендә. Шушы максатларга 2,5 млрд сум акча киткән, аның 30 проценты – федераль бюджеттан, 70ы – республика акчасы. Нәтиҗәдә, мәктәпкәчә яшьтәге балалар өчен 4,2 мең яңа урын булдырылган. Болардан тыш, 15 балалар бакчасында өстәмә 420 урын булдырылган, капиталь ремонт эшләренә 8 млн. сум каралган булган.

Бүген шул хакта Казан каласы Башкарма комитеты башлыгының төзелеш сәясәте мәсьәләләре буенча урынбасары Азат Нигъмәтҗанов “эшлекле дүшәмбе” киңәшмәсендәге хисабында әйтте. Аның сүзләренчә, Казанда элеккеге рекордта 20 бакча салынып, 3,7 мең яңа урын булдырылган иде.

Киләсе елда Казанда тагын 20 балалар бакчасы төзү күздә тотыла, шуңа 1,865 млрд. сум каралган, нәтиҗәдә, 3210 яңа урын булачак. Яңа бакчалар Р.Зорге, Халезов, Гвардия, Тэцэвская, Ферма шоссесы, Павлюхин, Габишеа, Фучик урамнарында, Камалиев проспектында, Павлов Молодежная урамнары чатында, М-14 микрорайонында, шулай ук Кояшлы, Константиновка, Чебакса, Сосновка бистәләрендә, «Салават купере» торак массивында, «Волжская гавань», «Солнечный город», «Светлая долина» торак комплексларында салыначак.

Шуларга өстәмә итеп, гамәлдәге бакчаларда 26сында төркемнәр оештырыла һәм 600 урынга арта, монысына исә 44,805 млн. сум акча бирелә. Капиталь ремонт күрәсе бакчалар 6га җыелган, ә аларда 375 урын булачак. Шуңа 111,222 млн. сум тәгаенләнгән. Җыеп кына әйткәндә, 2015 елда Татарстан башкаласында чират 4185 урынга кимиячәк, моның өчен 2,02 млрд. сум сарыф ителәчәк.