Энгель Фәттахов район мәгариф бүлеге методистларына, мәктәп директорларына һәм укытучыларга “Educare” сертификатлары тапшырды

Кичә Татарстан Республикасының Өстенлек мәктәпләре директорларына, укытучыларына һәм муниципаль районнарның мәгариф бүлеге методистларына “Educare” сертификатлары һәм ТР Мәгарифне үстерү институты таныклыкларын тапшыру тантанасы булды. Чарада ТР Премьер-министр урынбасары – ТР мәгариф һәм фән министры Энгель Фәттахов, “Educare International Consultancy” компаниясе генераль директоры Майк Тируман һ.б. катнашты.
2014 елда Татарстанның барлык районнарында 54 Өстенлек мәктәбе булдыру программасы эшли башлады. Әлеге мәктәпләрнең төп максаты: уңышлы XXI гасыр баласын үстерү, ТР мәктәпләре һәм районнары арасында үзара тәҗрибә уртаклашу һәм хезмәттәшлек мохите тудыру өчен алга киткән һәм инновацион программаларны (тәнкыйди фикер йөртү, кооператив укыту, проблемалы-ориентлашкан укыту, баш мие эшчәнлегенә булыша торган укыту, баетылган программа) кертү. РФ Мәгариф һәм фән министрлыгы һәм “Educare International Consultancy” сингапур компаниясенең уртак проекты кысаларында, ТРның һөнәри үсеш һәм методик коучинг системасын модернизацияләү республика педагогик хезмәткәрләренең укыту һәм идарә итү потенциалын ныгыту һәм киңәйтүгә юнәлтелгән.
Узган ел ярымда республиканың 48 районында 25 меңнән артык укытучыга даими методик ярдәм күрсәтү һәм тренинглар уздыру өчен 400дән артык остаз-укытучы һәм ТР муниципаль районнарының мәгариф бүлекләре методистлары әзерләнгән. Бүген мондый тренинглар мәктәп базаларында уздырыла, һөнәри берләшмәләр оештырылып, район укытучылары һәм методистларына методик ярдәм күрсәтелә.