Әлмәттә Клара Булатова исемендәге премия тапшырдылар

2015 елның 20 мартында Әлмәт дәүләт муниципаль хезмәт институтында шагыйрә Клара Булатова исемендәге премияне тапшыру тантанасы булып узды.

Әлеге премия институтның ректоры, педагогика фәннәре кандидаты, профессор Ильяс Рәхимҗан улы Сәлаховның тәкъдиме һәм институтның Гыйльми совет карары нигезендә, әдәби иҗат белән шөгыльләнүче талантлы укучыларны, студентларны барлау, аларга ярдәм итү, туган телгә мәхәббәт тәрбияләү максатыннан, 2012 елда булдырылган иде.

Быел бәйгедә Татарстанның 12 муниципаль районы һәм Казан, Яр Чаллы, Түбән Кама, Алабуга шәһәрләреннән мәктәп, лицей, гимназия укучылары, Казан (Идел буе) федераль университетының Филология һәм мәдәниятара коммуникацияләр институты, Казан (Идел буе) федераль университетының Алабуга институты, Казан дәүләт аграр университеты, Яр Чаллы дәүләт социаль-педагогик технологияләр һәм ресурслар институты, Әлмәт дәүләт нефть институты, Әлмәт дәүләт муниципаль хезмәт институты, Яр Чаллы шәһәре медицина көллияте, Әлмәт политехник техникумы, Әлмәт физкультура көллияте һәм Сарман аграр көллияте студентлары катнашты.

Премиягә дәгъва иткән 142 эш арасыннан иң яхшылары сайлап алынды. 20 егет һәм кыз акчалата премияләр һәм институтның махсус бүләкләренә ия булды.

Әлеге бәйгедә укучылары иң актив катнашкан мәктәпләр дә билгеләнде. Мөслим муниципаль районы “Мөслим гимназиясе”, Лениногорск шәһәре “11 нче гимназия”, Азнакай муниципаль районы “Тымытык урта гомуми белем бирү мәктәбе”нә акчалата премияләр һәм директорлары исеменә язылган рәхмәт хатлары тапшырылды.

К.Булатова премиясен булдыру яшь буынны милли рухта тәрбияләү һәм аларда ватанпәрвәрлек хисләрен үстерүдә зур бер юнәлеш булуны ассызыклап, укытучылар, килгән кунаклар Әлмәт дәүләт муниципаль хезмәт институты ректоры И.Р.Сәлаховка зур рәхмәтләрен белдерделәр.