Тәтеш районында “Ел укытучысы-2015” республика конкурсының зона этабы үтә

2015 елның 23-24 мартында Тәтеш муниципаль районында Советлар Союзы Герое П.С. Ханжин исемендәге 1нче номерлы Тәтеш урта мәктәбендә педагогик осталык буенча республика конкурсларының зона этаплары уза. Биредә республиканың алты районыннан конкурсның мәктәп һәм муниципаль этапларында уңышлы чыгыш ясаган 29 иң яхшы укытучы җыелды. Быел алар “Ел укытучысы-2015”, “Математика укытучысы-2015”, “Физика укытучысы -2015”, “Химия укытучысы-2015” исемнәрен алу өчен көч сынаша.
Исегезгә төшерәбез, республика конкурсы финалистлары 13-17 апрельдә Казанда узачак йомгаклау этабында катнашачак. “Татарстан Республикасы Ел укытучысы – 2015” конкурсының шигаре рәвешендә заманча мәгарифнең төп бурычларыннан берсе саналган, укытучының туктаусыз һәнәри һәм шәхси үсеше, иң яхшы педагогик практика үрнәкләрен тарату һәм инновацион фикерләрне һәм казанышларны алга сөрү бурычы сайланган – “Укытырга һәм укырга!”.
Конкурс ТР Мәгариф һәм фән министрлыгы, Халык мәгарифе һәм фән хезмәткәрләре профсоюзының республика комитеты тарафыннан уздырыла.