Көллият һәм техникум директорларының укыту-тәрбия эшләре буенча урынбасарлары өчен семинар-киңәшмә узды

2015 елның 29 нчы апрелендә “Габдулла Тукай исемендәге Арча педагогия көллияте” базасында укыту-тәрбия эшләре буенча директор урынбасарлары өчен семинар-киңәшмә узды.
Семинарның темасы “Өстәмә белем һәм сәнгать белешмәләренең яшь буында милли үзаңын булдыруда әһәмияте”. Семинар программасы үз эченә түбәндәге чыгышларны алды:
Гарипова Гөлнара Филаилевна, “Габдулла Тукай исемендәге Арча педагогия көллияте” директоры. “Ресурс центрның милли кадрлар әзерләүдәге әһәмияте”. Үзенең чыгышында директор ресурс центрның төп эшләре, үткәрелгән чаралар, нәтиҗәләр, киләчәккә булган планнар белән таныштырды. 2 ел дәверендә бик зур эш башкарылды, гимназия класслары эше җайланды, укыту семинарлары, конкурслар, республика күләмендәге конференцияләр уздырылды.
Гафарова Гөлнара Робертовна, “Габдулла Тукай исемендәге Арча педагогия көллияте”нең тәрбия эшләре буенча директор урынбасары. “Өстәмә белем бирүнең көллият тормышындагы урыны һәм әһәмияте”. Тәрбия эшләре буенча директор урынбасарының чыгышында теоретик материал практика белән тыгыз бәйләнеп күрсәтелде. Чыгыш дәвамында сәнгать түгәрәкләренә, спорт секцияләреннә яшь буында милли үзаңны булдыру, патриотик тәрбия ноктасыннан бәя бирелде.
Семинарның икенче өлешендә катнашучылар игътибарына концерт рәвешендә оештырылган сәнгать берләшмәләренең эше күрсәтелде (фотокүргәзмә, курчак театры, кул эшләре түгәрәге).