Казанда “Татарстан эрудиты-2015” VII республика конкурсы җиңүчеләрен бүләкләделәр

Бүген Казандагы “Идея” технопаркында “Татарстан эрудиты-2015” VII республика конкурсы җиңүчеләрен бүләкләделәр. Конкурсның төп координаторы, Н.И.Лобачевский исемендәге академик лицей директоры Татьяна Беспалова бәйгенең әһәмиятен ассызыклап, хәзерге заманның теге яки бу өлкәдә яхшы белгечләр генә түгел, төрле фәнни юнәлешләр чигендә эшләргә сәләтле шәхесләр әзерләү таләбен куюына игътибар юнәлтте.

“Татарстан эрудиты” – ТР Мәгариф һәм фән министрлыгы, ТР Фәннәр академиясе, “Идея” технопаркы һәм КФУның уртак проекты. Конкурс иҗади һәм интеллектуаль яктан сәләтле балаларга ярдәм итү, укучыларның гомуми эрудиция дәрәҗәсен ачыклауга юнәлтелә. Анда 7-11нче сыйныф укучылары катнаша.

Конкурсның I туры 17 апрель көнне КФУ базасында үткәрелгән. Анда катнашучылар 100 минутта математика, рус теле һәм әдәбияты, татар теле һәм әдәбияты, тарих, җәмгыять белеме, химия, физика, биология һәм география фәннәре буенча 100 сорауга язмача җавап бирергә тиеш иде. I турда уңышка ирешкән укучылар сынауны бүген бәйгенең “Идея” технопаркында үткәрелгән йомгаклау өлешендә дәвам иттерде. Алар ТР Фәннәр академиясе галимнәре һәм фәнни хезмәткәрләре тарафыннан мәктәп программасына кертелмәгән материаллар буенча әзерләнгән сорауларга телдән 3 сәгать дәвамында җавап бирде. Бу турда катнашучыларның белеме генә түгел, зирәклеге һәм мантыйкый фикер йөртүе дә бәяләнде. Быел конкурста Татарстан районнары һәм шәһәрләренең 50 мәктәбеннән 300гә якын укучы катнашкан. Бәйгенең йомгаклау өлешендә исә 150ләп бала көч сынашты.

2011 нче елда “Идея” технопаркы тарафыннан конкурс кысаларында “Нано-IQ” номинациясе гамәлгә куйган. Ике этаплы сайлау нәтиҗәләре буенча бу номинациядә III урынны Казанның 39нчы мәктәбе укучысы Артур Янбәков яулады. II урынга Түбән Каманың 35нче мәктәбеннән Андрей Кобелев лаек булды. Төп җиңүче дип Казанның 9нчы мәктәбе укучысы Булат Максудов табылды. Аларны “Идея” технопаркы генераль директоры Сергей Юшко бүләкләде. Ул “Татарстан эрудиты” конкурсында уңышка ирешүнең киләчәктә югары уку йортына кергәндә БДИ нәтиҗәләренә өстәмә баллар алырга мөмкинлек бирүе турында искәртте.

“Татарстан эрудиты” конкурсы җиңүчеләре, традицион рәвештә, ике яшь категориясе буенча билгеләгәнде. 7-9 нчы сыйныфлар арасында I урын Казанның 9нчы мәктәбе укучысы Валентина Даниловага, өлкән сыйныф вәкилләре арасында Түбән Каманың 35нче мәктәбеннән Алексей Сорокинга тәтеде. Аларга ноутбук тапшырылды.
7-9 нчы сыйныф укучылары арасында Түбән Каманың 35нче мәктәбеннән Әмир Гәрәев һәм Казанның IT-лицееннан Әмир Миңнебаев, 10-11нче сыйныфлар арасында Түбән Каманың 35нче мәктәбеннән Эмиль Сәлахетдинов һәм Казанның 177нче мәктәбеннән Гүзәл Әхмәтҗанова конкурсның лауреатлары дәрәҗәсенә лаек булды.