Социаль юнәлешле коммерциячел булмаган оешмаларның өченче Республика форумы

2015 елның август аенда Казанда социаль юнәлешле коммерциячел булмаган оешмаларның өченче Республика форумы үтәчәк. Әлеге чарада 1000гә якын кеше, шул исәптән министрлык һәм ведомство, коммерциячел булмаган оешма вәкилләре катнашачак.
Форумның максаты - коммерциячел булмаган оешмаларның социаль мәсьәләләрне хакимият һәм массакүләм мәгълүмат чаралары белән бергәләп чишү юлларын эзләү.
Форумның бурычлары булып социаль юнәлешле коммерциячел булмаган оешмаларның иң яхшы практикларын ачыклау, аларга ярдәм күрсәтү һәм пропагандалау; республикабызга һәм анда яшәүчеләргә файда китерүче реаль проектларга, реаль кешеләргә җәмәгатьчелек игътибарын җәлеп итү тора.
Шул ук вакытта форум коммерциячел булмаган оешмаларның социаль инициативаларын тәкъдир итү һәм җәмгыяти, социаль- шәхси партнерлыкка кагылышлы көнүзәк мәсьәләләрне тикшерү урыны булачак. Татарстан Республикасының социаль юнәлешле коммерциячел булмаган оешмаларын үстерү һәм аларга ярдәм күрсәтүгә нәтиҗәләр ясалачак, гражданлык җәмгыятен ныгытуда төп бурычлар билгеләнәчәк.