Бүген чыгарылыш сыйныф укучылары рус теленнән БДИ тапшыра

Казан чыгарылыш сыйныф укучылары 10.00 сәгатьтә рус теленнән Бердәм дәүләт имтиханы биремнәрен эшләргә кереште. Бу быел Татарстанда 18 меңнән артык чыгарылыш сыйныф укучысы тапшыра торган беренче массакүләм имтихан. Имтихан 3,5 сәгать дәвам итә.
ТР мәгариф һәм фән министры урынбасары Илдар Мөхәмәтов сөйләвенчә, бүген мәҗбүри фән буенча БДИ тапшыру өчен 86 пункт ачылган. “Имтихан үткәрү пунктлары металл кысалар, видеокүзәтү системалары белән җиһазланган, бу БДИ үткәрүне объектив һәм үтә күренмәле итү өчен эшләнелә”, - дип билгеләп үтте ул.
И.Мөхәмәтов искәрткәнчә, быел имтиханда тест өлеше яки җавапларны сайлап алу мөмкинлеге юк. Имтихан эше ике өлештән тора. БДИ тапшыручыларга канәгатьләнерлек нәтиҗәгә ирешү өчен 24 балл җыю зарур.
Татарстанда 86 имтихан тапшыру пунктыннан тыш, физик мөмкинлекләре чикләнгән балалар өчен 66 пункт, шул исәптә өйдә 21 пункт ачылган. “Бу балалар 3 сәгать 55 минут имтихан тапшыра”, - дип өстәде министрлык вәкиле.
Узган ел Татарстан чыгарылыш сыйныф укучылары үз нәтиҗәләре белән куандырды: республикада рус теле буенча күрсәткечләр – 65,8 балл, ул Россия буенча уртача күрсәткечләрдән 3,3 баллга югары иде. Моннан тыш, 80 баллдан югары нәтиҗәгә ирешкән укучылар 15,3 процент тәшкил итте. Ә минималь балл җыя алмаучылар - 0,2 процент, бу Россиядәге уртача күрсәткечләрдән 8 гә кимрәк иде. “Быел да укучылар югары нәтиҗәләргә ирешер һәм БДИ уңышлы тапшырыр дип ышанабыз”, - диде И.Мөхәмәтов.
Казанда БДИ тапшыру пунктларының берче 37 гимназиядә урнашкан. Биредә рус теленнән БДИ 10, 37, 26, 36 нчы гимназияләр, шулай ук 33, 62, 117 һәм 112 мәктәп укучылары тапшыра.
ТР Мәгариф һәм фән министрлыгы 1952 җәмәгать күзәтүчесен аккредитацияләгән.
Билгеләп үтик, рус теленнән БДИ нәтиҗәләре 10 көннән соң билгеле була.