Казанда “Мәктәп эко-патруле” конкурсы җиңүчеләрен бүләклиләр

Иртәгә 10.00дә Казанның Җиңү паркында “Мәктәп эко-патруле” конкурсы җиңүчеләрен бүләкләү тантанасы була.

Искәртеп үтик: бәйге 2014 елның 1 сентябреннән агымдагы елның 1 маена кадәр уздырылды. Анда Татарстан урта белем бирү йортлары укучылары катнашты. Конкурс ТР Экология һәм табигать ресурслары министрлыгы тарафыннан, ТР Мәгариф һәм фән министрлыгы, ТР Мәгълүматлаштыру һәм элемтә министрлыгы белән берлектә, оештырылды.
Аның кысаларында кесә телефоны булган һәр укучы укудан бушаган вакытта рөхсәтсез урыннарда хасил булган чүплекләрне фотога төшереп, Татарстан Мәгълүматлаштыру һәм элемтә министрлыгының колл-үзәге фильтры аша Татарстан Экология һәм табигый ресурслар министрлыгына җибәрде.

Конкурста республиканың барлык муниципаль районнары һәм шәһәр округларының 200 мәктәбеннән меңләп укучы шушы эшкә кушылган. Рөхсәт ителмәгән урыннардагы чүплекләр төшерелгән 1281 фотохәбәр кабул ителгән. Җиңүчеләр “Иң актив укучы”, “Иң актив сыйныф”, “Иң актив мәктәп” номинацияләрендә билгеләнгән. Аларга кыйммәтле бүләкләр тапшырылачак, дип вәгъдәли чараны оештыручылар.

Бүләкләү тантанасы кысаларында уеннар, бәйгеләр, викториналар, фәнни шоу, кул эшләнмәләре ясау буенча мастер класслар үткәрү күздә тотыла. Аларда теләгән һәркем катнаша алачак.