Энгель Фәттахов: “WorldSkills Russia” III илкүләм чемпионаты практикага юнәлтелгән”

Татарстан икътисадының киләчәк үсеше өчен югары квалификацияле эшче кадрларның җитәрлек санда булуы шарт. Бүген алар, нигездә, һөнәри урта махсус белем бирү йортларында әзерләнә. Моннан тыш, “2014-2020 елларга Татарстан Республикасында һөнәри белем бирүне үстерү” программасын гамәлгә ашыру кысаларында, республикада ресурс үзәкләр ачыла. Быел шундый 9 белем йортын ачу күздә тотыла. Бу хакта бүген ТР Хөкүмәте йортында үткәрелгән брифингта ТР Премьер-министры урынбасары – мәгариф һәм фән министры Энгель Фәттахов бәян итте. Брифингта сүз 19-23 май көннәрендә Татарстан башкаласында уздырылган “WorldSkills Russia” III илкүләм чемпионаты финалы йомгаклары турында барды.

Министр билгеләп узганча, мәктәпне тәмамлаганда, укучылар теоретик яктан гына түгел, практик яктан да әзер булып чыгарга тиеш. Дөресен әйтергә кирәк: бүгенге укыту программалары күп очракта балаларның торетик әзерлегенә юнәлтелә. Шуңа күрә, югары һәм урта махсус белем бирү йортларын тәмамлаучылар эш урыннарына баргач, еш кына кыен хәлдә кала: алар алган белемнәрен гамәлдә файдалана белми. Хәзерге вакытта РФ Мәгариф һәм фән министрлыгы тарафыннан эшче төркем оештырылды. Ул уку программаларын практикага якынайту юнәлешендә эш алып бара, дип сөйләде ул.

Энгель Фәттахов сүзләренчә, “WorldSkills Russia” III илкүләм чемпионаты да практикага юнәлтелгән. Былтыр республикада 9нчы сыйныфны тәмамлаучыларның 51 проценты һөнәри белем бирү йортларына укырга кергән. Министр моны уңай күренеш буларак бәяләде һәм эшче һөнәр ияләренең хезмәт хаклары югары булуын билгеләп узды. Өстәвенә, аларның югары белем алу мөмкинлекләре бар, дип өстәде ул.

Энгель Фәттахов ТРда эшче кадрлар әзерләү буенча эшнең дәвам иттереләген ассызыклап: “Шуңа да без “WorldSkills Russia” илкүләм чемпионатын икенче елга да үзебездә кабул итәргә әзер, шуңа да без “WorldSkills” халыкара чемпионатын уздыруга дәгъва белдердек”, – диде.

“WorldSkills Russia” III илкүләм чемпионаты финалы йомгаклары турында сөйләгәндә, ул анда Россиянең 46 төбәгеннән, шулай ук Марокко, Израиль, Финляндия һәм Беларусь белән Казакъстаннан барлыгы 519 конкурсант катнашуын искәртте. Моннан тыш, Татарстан башкаласына 613 эксперт чакырылган булган. Шуларның 55 төп экспертлар, 19ы дөньяның 9 иленнән (Марокко, Израиль, Финляндия, Япония, Көньяк Корея, ЮАР, Германия, Ирландия, Швейцария) халыкара һәм 22 се БДБ (Беларусь, Казакъстан) илләреннән килгән экспертлар. Чемпионат кысаларында юниорлар арасында да һөнәри осталык буенча ярышлар оештырылган. Аларда Россиянең 14 төбәгеннән 100 укучы (ТРдан 41 укучы) һәм 70 эксперт катнашкан.

Гомуми нәтиҗәләр буенча Татарстан җыелма командасы 28 призлы урын – 7 алтын, 10 көмеш һәм 11 бронза медале яулап, җиңүче исмеменә лаек булды.

ТР мәгариф һәм фән министры хәбәр иткәнчә, ТР җыелмасы, медицина оптикасыннан тыш, чемпионатның калган барлык компетенцияләрендә катнашкан. Татарстанда бу юнәлеш буенча “WorldSkills” таләпләренә җавап бирә торган әзерлек башкарылмый һәм белгечләр әзерләнми, дип шәрехләде ул бу уңайдан.

Чара Мәгариф үсеше стратегиясе кысаларында финансланган. Бу максатка федераль бюджеттан һәм республика казнасыннан 70-80 млн сум акча бүлеп бирелгән. Шулай ук спонсорлар чаралары җәлеп ителгән.

Чемпионатны уздыру барышында, “Казан ярминкәсе”нә конкурсантларның көч сынашуын карарга 63 мең укучы һәм студент килгән. Спорт проектлары Башкарма дирекциясе генераль директоры Азат Кадыйров китергән мәгълүматларга караганда, “WorldSkills Russia” ярышлары трансляциясен 11,3 мең кеше караган.