Казанда робот техникасы буенча республика фестивале җиңүчеләре билгеле булды

Кичә Казанның “Идея” технопаркында робот техникасы буенча V республика фестивале уздырылды. Анда Татарстанның төрле шәһәрләреннән һәм районнарыннан 60лап укучы катнашты. Роботларның ярышуын карарга һәм аларны ясаган яшь техниклар белән аралашырга исә берничә дистә тамашачы килде.

Ярышлар, традицион рәвештә, 4 категория: линия буенча узышлар (кара линия буенча хәрәкәт итүче робот башлангыч ноктадан финишка бик тиз барып җитәргә тиеш); сумо (катнашучылар рингның кара линиясеннән тиз арада көндәшен этеп чыгара торган автоном робот әзерләргә тиеш); кегельринг (түгәрәктән 5 секундка гына чыгу мөмкинлеге булган, кегельләрне тиз арада тарата торган робот) һәм иҗади категория (ЛЕГО нигезендә җыелган проектлар) буенча үткәрелде.

Алдагы еллардан аермалы буларак, быел катнашучыларның күпчелеге сумо һәм кегельринг ярышларында көч сынашты. Иҗади номинациядә үз эшләрен тәкъдим итүче укучылар саны исә, киресенчә, азрак иде.

Шуны да билгеләп узу зарур: фестивальдә даими рәвештә катнашучыларның саны елдан-ел арта. Быел бәйгедә катнашкан малайлар һәм кызларның яртысыннан күбрәге үзләрен бу чарада икенче яки өченче тапкыр сынап карады. Мәсәлән, Яр Чаллының 36нчы инновацион технологияләр лицей-интернаты укучысы Артур Лукьянов былтыр жюри хөкеменә аз күрүче һәм күрмәүче кешеләр өчен Lego конструкторы ярдәмендә җыелып, программалаштырылган шлем прототибын тәкъдим иткән булса, быел ул аз күрүчеләр һәм күрмәүчеләр өчен перчатка эшләп килгән. Перчатканың ультратавышлы датчигы объектка кадәрге араны үлчи, процессор аны исәпләп, вибромоторга төрле интенсивлыктагы сигнал җибәрә: кеше әйбердән никадәр ераграк булган саен, моторның эш интенсивлыгы да шулкадәр азрак. Әлеге җайланманы ясауга укучы 2-3 ай вакытын сарыф иткән. “Шлемны әтием җитәкчелегендә эшләгән булсам, перчатка – тулысынча минем хезмәт”, – дип сөйләде Артур. 11 яшьлек укучы киләчәктә бу техник эшләнмәләрен камилләштерергә, шулай ук Брайль шрифты белән бастыра торган принтер булдырырга ниятли.

Конкурс нәтиҗәләре буенча, призерлар өчлеге түбәндәгечә булды:

Линия буенча узышлар:

1. Казан Суворов хәрби училищесы

2. Яр Чаллының 5нче балалар техник иҗаты үзәге

3. Яр Чаллының 5нче балалар техник иҗаты үзәге

Сумо:

1. Балалар иҗаты йорты (Питрәч районы)

2. Югары Ослан районы Макыл урта мәктәбе

3. Яр Чаллының 36нчы инновацион технологияләр лицей-интернаты

Кегельринг:

1. Казанның КФУ карамагындагы 2нче татар гимназиясе

2. Казанның КФУ карамагындагы 2нче татар гимназиясе

3. Яр Чаллының 5нче балалар техник иҗаты үзәге

Иҗади категория:

1.Яр Чаллының 36нчы инновацион технологияләр лицей-интернаты

2. Казан Суворов хәрби училищесы

3. “Идея” технопаркы каршындагы Лего конструкцияләү үзәге