Нурлат командасы Бөтенроссия робот техникасы олимпиадасы категорияләренең берсендә җиңү яулады

Татарстан командасы 8-10 июнь көннәрендә Иннополис шәһәрендә уздырылган Бөтенроссия робот техникасы олимпиадасы категорияләренең берсендә җиңү яулады.

Бу хакта бүген ТР Хөкүмәте йортында үткәрелгән брифингта ТР Премьер-министры урынбасары – ТР мәгълүматлаштыру һәм элемтә министры Роман Шәйхетдинов хәбәр итте. Ул Татарстанда икенче ел рәттән уздырылган олимпиаданың нәтиҗәләре белән таныштырды.

Министр китергән мәгълүматларга караганда, быел бөтенроссия робот техникасы олимпиадасында Россиянең 45 төбәгеннән 397 команда һәм 790 катнашучы көч сынашкан. Алар – үз субъектларында робот техникасы ярышларында финалга чыгучылар. Татарстан данын исә Казан, Яр Чаллы, Алабуга, Бөгелмә, Нурлат шәһәрләреннән, шулай ук Урыссу, Байлар Сабасы шәһәр тибындагы бистәләреннән барлыгы 23 команда яклаган.

Кече яшь төркемнәре арасында ирекле категориядә лабиринт биремен үтәгәндә, Нурлат укучылары Софья Фадькина һәм Рифат Гарифуллинга (җитәкчеләре – Нурлат гимназиясе укытучысы Алексей Фадькин) тиңнәр булмаган.

“Быел олимпиадада катнашкан командалар саны, узган ел белән чагыштырганда, 24кә күбрәк булды. Хәзерге вакытта, киләсе елга Татарстан районнары һәм Россия төбәкләренннән катнашучы командалар санын тагын да арттыру максатыннан, тәкдимнәр әзерләнә”, – дип сөйләде Роман Шәйхетдинов. Ул ярышларның төп, иҗади, ирекле, роботлар футболы һәм студентлар категорияләрендә уздырылуына игътибар юнәлтте. 5 яшьтән алып 24 яшькәчә (былтыр иң өлкән катнашучыга 22 яшь булган) катнашучылар 19 төр буенча көч сынашкан.

Министр билгеләп узганча, җәй ахырында югары күрсәткечләргә ирешкән командалар, әзерлек үтәр өчен, кабат Иннополис шәһәренә җыелачак. Нәтиҗәдә, Катарда уздырылачак XII бөтендөнья роботлар олимпиадасында катнашачак Россия җыелма командасы составы билгеләнәчәк.
Олимпиада кысаларында фән фестивале дә үткәрелгән: ярышлар арасында яшьләрнең масстер-классларда катнашу, лекцияләрдә фән казанышлары белән танышу, фәнни тамашалар карау мөмкинлеге булган.
Гомуми нәтиҗәләргә килгәндә, иң яхшы күрсәткечләргә Санкт-Петербург егетләре һәм кызлары ирешкән: барлыгы 5 команда I урынны яулаган. II урында – Мәскәү, IIIдә – Свердловск өлкәсе.
Липецк һәм Оренбург өлкәләренең, Татарстан Республикасының 1шәр командасы I урынга лаек булып, әлеге төбәкләр 8-10 нчы урыннарны бүлешкән.

Искәртеп үтик: киләсе елга бөтенроссия робот техникасы олимпиадасы кабат Иннополис университетында уздырылачак. Ул 2018 елга кадәр олимпиаданы үткәрү хокукын яулады.