Казанның 121нче лицеенда Советлар Союзы Герое Сабир Әхтәмовны искә алдылар

Кичә Казанның 121нче лицее актлар залында Советлар Союзы Герое Сабир Әхтәмовның (1926-2014) туган көненә багышланган тантаналы чара уздырылды. Анда ТР Дәүләт Советының законлылык һәм хокук тәртибе буенча комитеты рәисе Рафил Нугуманов, ТР буенча эчке эшләр министры урынбасары, эчке хезмәт генерал-майоры Дамир Динниулов, ТР Милли музее карамагындагы “Витязь” хәрби-тарихи клубы җитәкчесе Вячеслав Хабаров, Сабир Әхтәмовның кызы Әлзия Кантимерова, лицей директоры Венера Хәйретдинова, укучылар катнашты.

Лицеистлар Сабир Әхтәмовның язмышы, аның сугышта кылган батырлыклары, аңа ни рәвешле Советлар Союзы Герое исеме бирелүе, Ленин ордены һәм башка орденнар, “Алтын йолдыз” медале тапшырылуы, музейда аның истәлегенә музей оешуы турында сөйләде.

Озак еллар буена ветеран лицей урнашкан Космонавтлар урамында яши. Үзе исән вакытта ул шушы лицейда еш кунак була, батырлык дәресләре уздыра, бәйрәм чараларында катнаша һәм балаларга сугыш турында сөйли.

Кунаклар лицей җитәкчелеген геройның исемен мәңгеләштерүгә керткән зур өлеше өчен, лицеистларга исә легендар шәхескә карата кызыксынулары өчен рәхмәт белдерде.

Дамир Динниулов бу төр чараның илгә Җиңү яулаган батырны искә төшерү, киләчәк буыннар хакына аның батырлыгын тарихта саклау, бу турыда яшьләрнең хәтеренә тагын бер мәртәбә төшерү булуын билгеләп узды.

“Витязь” клубы вәкилләре исә лицейның Сабир Әхтәмов исемендәге музеена танкка каршы Дегтяров системалы бер зарядлы корал макетын һәм бу корал турында мәгълүмат урнаштырылган истәлек рамкасын тапшырды.

Сугышта Сабир Әхтәмов 4 нче гвардияче мотоукчылар бригадасының танкка каршы ата торган корал укчысы була. Әлеге корал макеты аның батырлыгы истәлегенә, үсеп килүче буында ватанпәрвәрлек хисләре тәрбияләү максатыннан, Милли музей ярдәме белән эшләнелгән.

Искә алу чарасының тантаналы өлешеннән соң, лицеистлар кунакларга музей буйлап экскурсия оештырды.