Бөтенроссия иншалар бәйгесе - 2016ның нәтиҗәләре билгеле булды

2016нчы елның 3нче ноябрендә Мәскәүдә Россия Федерациясе Мәгариф һәм фән министрлыгында Бөтенроссия иншалар бәйгесе җиңүчеләрен бүләкләү тантанасы узды. Питрәч районы Богородск урта мәктәбе укучысы Айсылу Шәрәфиева Бөтенроссия иншалар бәйгесе - 2016ның җиңүчесе дип табылды.

Татарстаннан тагын ике укучы махсус номинацияләрдә җиңү яуладылар. Казан шәһәре Идел буе районының 139нчы номерлы гимназиясеннән Дана Нәгыймуллина "Җанлы классика" проектының махсус номинациясендә, ә Спас районы Никольский урта мәктәбе укучысы Татьяна Авдонина "Әкият йорты" интерактив музей-театрының "Яшь әкиятче" махсус номинациясендә җиңделәр. 

Бөтенроссия иншалар бәйгесе 2016нчы елда мөстәкыйль иҗат төре буларак иншалар язу гадәтен торгызу максатыннан уздырылды.

Бәйгедә гомум белем бирү йортларының 4-11нче сыйныф укучылары һәм урта һөнәри белем бирү оешмалары студентлары катнашты. Бәйге ике этаптан тора иде: 1нче этап - региональ, 2нчесе - федераль. Федераль этапта бәйгенең региональ этабында җиңүчеләр катнашты - Россиянең 84 субъектыннан 292 эш.

Җиңүчеләрнең исемнәрен атау һәм аларны бүләкләү тантаналы атмосферада узды. Тантананы Россия Федерациясе мәгариф һәм фән министры Ольга Васильева ачты.