ЯҢАЛЫКЛАР

2014 елның 29 декабреннән республика мәктәп укучыларының кышкы каникуллары башланды. Укучыларның ялы ике атна дәвам итәчәк һәм 11 гыйнварда тәмамланачак.

31 декабрьдә Түбән Кама шәһәрендә “Әллүки” балалар бакчасы ачылачак. Ачылу тантанасында Татарстан Республикасы Премьер-министры урынбасары – мәгариф һәм фән министры Энгель Фәттахов катнашачак. “Әллүки” балалар бакчасы 260 урынга исәпләнгән, моннан тыш биредә логопед һәм психолог кабинетлары, музыка һәм спорт заллары бар.

Киләсе елда Татарстанда республиканың барлык муниципаль берәмлекләрендә дә белем бирүнең бер үк төрле сыйфаты тәэмин ителүгә игътибар биреләчәк. Моннан тыш, мәгариф өлкәсендәге төп юнәлешләр арасында мәктәпкәчә белем бирү, һөнәри юнәлеш бирү һәм урта һөнәри белем булачак. Бу хакта журналистлар белән очрашуда ТР Премьер-министры урынбасары - мәгариф һәм фән министры Энгель Фәттахов сөйләде.

24 декабрьдә Минзәләнең М.Җәлил исемендәге педагогика көллиятендә педагогик кадрлар әзерләү мәсьәләләре буенча йомгаклау киңәшмәсе узды. Киңәшмәдә мәктәп һәм көллият директорлары, педагогика югары уку йортлары җитәкчеләре, мәгариф идарәсе җитәкчеләре катнашты.

Бүген, 25 декабрьдә Казанда, Татарстан Республика Премьер-министры урынбасары – мәгариф һәм фән министры Энгель Фәттахов катнашында, сәләтле яшьләрне бүләкләү тантанасы узды. РФ Президенты премиясе лауреатларының гомуми күләме быел 164 кешене тәшкил итә.

2014 елның 18-20 декабрендә Казанда мәктәп укучыларының чуаш, мари, мордва һәм удмурт телләре һәм әдәбиятлары буенча республика олимпиадаларының йомгаклау этабы узды. Олимпиадаларда 70тән артык мәктәп укучысы катнашты. Жюри карары буенча чуаш теле һәм әдәбияты буенча олимпиадада Апас, Баулы, Чирмешән районнары һәм Түбән Кама шәһәре укучылары җиңеп чыкты, мари теле һәм әдәбияты буенча – Актаныш һәм Әгерҗе районнары укучылары, мордва теле һәм әдәбияты буенча – Бөгелмә һәм Тәтеш, удмурт теле һәм әдәбияты буенча – Әгерҗе һәм Кукмара районнары укучылары беренчелекне яулады.

2014 елның 24 декабрендә Казан шәһәренең 6нчы номерлы кадет мәктәп-интернаты базасында республикакүләм семинар-киңәшмә узды. Семинарда катнашучылар белем бирү процессы сыйфатын бәяләү, мәктәп эчендәге контроль, документлар тутыру мәсьәләләре хакында фикер алыштылар.

Бүген Казанда IT-паркта “IT-чемпион” республикакүләм конкурсы җиңүчеләре бүләкләнде. Тантанада Татарстан Президенты Рөстәм Миңнеханов, ТР Премьер-министр урынбасары – мәгълүматлаштыру һәм элемтә министры Роман Шәйхетдинов, ТР мәгариф һәм фән министрының беренче урынбасары Андрей Поминов катнашты.

19 декабрьдә РФ Дәүләт Думасында “Хезмәткә һәм оборонага әзер” (ГТО) физкультура-спорт комплексын кертү өлкәсендә Бөтенроссия проектлар конкурсы финалы узды. Кукмараның 4 нче урта мәктәбе физкультура укытучысы Айрат Шаһабиев конкурста 1 нче урынны алды, аның дәресе иң яхшысы дип табылды.

Быел Казанда, төбәкләрдә мәктәпкәчә белем бирү системасын үстерү һәм бакчаларга урнашу чиратларын бетерүдә “юл картасы” чараларын гамәлгә ашыру кысаларында, 30 балалар бакчасы төзелгән (2се былтыргыдан төзелеп бетми калган булган), шуларның 7се – Вознесенское, Залесный, Кадышево, Малые Клыки, Отары, Петровский, Привольный бистәләрендә. Шушы максатларга 2,5 млрд сум акча киткән, аның 30 проценты – федераль бюджеттан, 70ы – республика акчасы. Нәтиҗәдә, мәктәпкәчә яшьтәге балалар өчен 4,2 мең яңа урын булдырылган. Болардан тыш, 15 балалар бакчасында өстәмә 420 урын булдырылган, капиталь ремонт эшләренә 8 млн. сум каралган булган.