ЯҢАЛЫКЛАР

Бу уку елыннан районыбыз мәктәпләре ике тапкыр ашатуга күчте. Укучылар өчен меню ике атна алдан төзелә. Балаларны тукландыруда уку йорты коллективлары җитештергән продукция кулланыла, бу максатларга әти-әниләр керткән акча һәм бюджет финанс чаралары тотыла.

Татарстан мәгариф учреждениеләренең традицион авыл хуҗалыгы продукциясе ярминкәсе бүген Казанда уздырылды. “Казан” агросәнәгать паркындагы сәүдә рәтләрендә ТР Премьер-министры Илдар Халиков та булып, эш барышын карады. Аны исә Татарстан вице-премьеры – авыл хуҗалыгы һәм азык-төлек министры Марат Әхмәтов, шулай ук республика вице-премьеры – мәгариф һәм фән министры Энгель Фәттахов, ТР хезмәт, мәшгульлек һәм социаль яклау министры Эльмира Зарипова озата йөрде.

Агымдагы елның 7 октябреннән Татарстанда ата-аналардан теләсә нинди ихтыяҗларга акча һәм башка матди байлыклар җыю тыела. ТР Премьер-министры урынбасары - мәгариф һәм фән министры Энгель Фәттахов имзалаган тиешле хат муниципаль берәмлекләрнең мәгариф идарәләренә таратылган. Документта билгеләп үтелгәнчә, Татарстан Мәгариф һәм фән министры мәгариф һәм белем бирү оешмалары өлкәсендәге башкарма хакимият органнары адресына гамәлдәге законнарны үтәүне тәэмин итү һәм укучыларның ата-аналарыннан финанс һәм матди чаралар җәлеп итүгә юл куймау буенча инструктив-методик хатларны тарата килгән. Шуңа да карамастан, гражданнардан һәм иҗтимагый оешмалардан алына торган мөрәҗәгатьләр мондый очракларның теркәлүе хакында сөйли.

Зәйнең 4нче мәктәбендә педагоглар өчен техник иҗат буенча "Startup Energy" дип исемләнгән семинар үтте. Анда Казан дәүләт энергетика университетының өзлексез белем бирү буенча профессоры Александр Леонтьев фәнни-техник иҗат буенча яңа укыту алымнары белән таныштырды, кызыклы дәресләр күрсәтте.

Район мәктәпләрендә табигатьне саклауны максат итеп куйган “Чисталык дәресләре” акциясе узды. Анда 1258 укучы катнашты.

6 октябрьдә Казанда “Баскет холл” спорт комплексында узган Халыкара Укытучылар көненә багышланган бәйрәм тантанасының телевизион версиясен 12 октябрьдә, якшәмбе көнне 13 сәгать 30 минутта “Яңа гасыр” телеканалында карарга мөмкин булачак.

10 октябрьдә Казан Үзәк стадионының өсте каплаулы җиңел атлетика манежында Татарстан мәгариф хезмәткәрләренең җәйге Спартакиадасы финалы уза. Ярышларда республиканың бөтен районыннан 1,5 мең педагог, мәгариф идарәләре һәм бүлекләре җитәкчеләре катнаша.