ЯҢАЛЫКЛАР

Укытучылар көне уңаеннан, Татарстанның 26 укытучысына 200әр мең сум күләмендә премия тапшырылачак. Бу хакта Дмитрий Ливанов имзасы белән “Российская газета”да дөнья күргән РФ Мәгариф һәм фән министрлыгы боерыгында язылган.

Бүген Әлмәтнең "Дружба" микрорайонында 260 урынлы 4нче "Дружба" балалар бакчасы ачылды. Мәктәпкәчә белем бирү учреждениесен тантаналы ачуда ТР Президенты вазифаларын вакытлыча башкаручы Рөстәм Миңнеханов, Әлмәт муниципаль районы башкарма комитеты җитәкчесе Айрат Хәйруллин, "Татнефть" ГАҖ генераль директоры Наил Маганов һәм башкалар катнашты.

2 сентябрьдә Идел буе федераль округының Советлар Союзы Герое Гани Сафиуллин исемендәге Татарстан кадетлар корпусыннан 40 яшүсмер "Артек" лагерына "Идел буе кадетлары" уку-сәламәтләндерү җыенына китте.

4-24 сентябрьдә Анапа шәһәрендә “Смена” бөтенроссия балалар үзәгендә укучыларның “Президент ярышлары” спорт бәйгесенең бөтенроссия этабы уздырыла.

Бүген "Казан Арена" стадионы янында беренче курс студентларының Белем көненә багышланган тантанасы булды. Мондый тантана быел беренче тапкыр уздырылды. Анда ТР Президенты вазыйфаларын вакытлыча башкаручы Рөстәм Миңнеханов катнашты. Шулай ук анда ТР Президенты Аппараты җитәкчесе Әсхать Сәфәров, ТР Президенты ярдәмчесе Ләйлә Фазлыева, ТР Премьер-министры урынбасары - ТР мәгариф һәм фән министры Энгель Фәттахов, республика югары уку йортлары ректорлары һ.б. рәсми затлар да бар иде.
Тамашада Филүс Каһиров, Айгөл Хәйри, Илназ Сафиуллин, Айдар Сөләйманов, Алинә Шәрипҗанова һәм республиканың танылган башка артистлары чыгыш ясады. Аларның чыгышлары бердәмлеккә, туган якка мәхәббәткә мәдһия җырлаудан гыйбарәт иде. Беренче курс студентлары каршында Татарстанның 16 югары уку йорты ректоры да чыгыш ясады: алар җыр башкарды.

Бүген Иннополиста 225 урынга исәпләнгән балалар бакчасы һәм «Иннополис» университеты карамагындагы халыкара мәктәп ачылды. Социаль әһәмияткә ия яңа объектлар ачылуын Иннополис мэры Егор Иванов шәһәр үсеше тарихындагы әһәмиятле вакыйга дип атады. "Гаиләләр яши башлагач, шәһәрдә чын мәгънәсендә тормыш кайнаячак. Димәк, биредә эш урыннары гына түгел, балалар өчен инфраструктура да пәйда булырга тиеш. Иннополиста хәзер үк гаиләләр күп, Россия төбәкләреннән дә, шулай ук чит илләрдән дә, - диде ул. Британия белем бирү системасы буенча эшләячәк әлеге уникаль балалар бакчасы төзүчеләр, укытучылар, республика җитәкчеләре, шәхсән Рөстәм Миңнехановның зур хезмәте нәтиҗәсе".

Бүген Казанның Дәрвишләр бистәсенең 58нче мәктәбендә кадетлар корпусы ачылды. Чарада Наркотиклар әйләнешен контрольда тоту федераль хезмәтенең ТР буенча идарәсе җитәкчесе, полиция генерал-лейтенанты, ТР Дзюдо федерациясе президенты Фаяз Шабаев, Казанның Совет районы хакимияте башлыгы Рөстәм Гафаров, Наркотиклар әйләнешен контрольда тоту федераль хезмәтенең ТР буенча идарәсе җитәкчесе урынбасары, полиция генерал-майоры Борис Тетенищев һәм башкалар катнашты.

Бүген ТР Премьер-министры Илдар Халиков Идел буе федераль округының Түбән Камада урнашкан Татарстан кадетлар корпусында Белем көнен бәйрәм итүдә катнашты.

Быел Зәй районы белем бирү йортларының һәрберсендә юл хәрәкәте иминлеге буенча яшь инспекторлар отрядлары оештырылачак.