ЯҢАЛЫКЛАР

Татарстанның иң яхшы билингваль балалар бакчалары 50 млн сум алды. 30 июньдә  Идел буе спорт һәм туризм академиясенең уку-лаборатория корпусында грантлар тапшырылды. 1 млн сум күләмендә грантлар мәктәпкәчә мәгариф учреждениеләренә “Киләчәк” 2010-2015 елларга ТР да мәгариф стратегияләре кысаларында өченче тапкыр тапшырыла. Грантлар балаларга ике дәүләт телен өйрәтүдә югары нәтиҗәләргә ирешкән иң яхшы балалар бакчаларына бирелә.

Россия Мәгариф һәм фән министрлыгы россиялеләрне югары белем белән тәэмин итү буенча бюджет урыннарын кыскартырга планлаштырмый.

26 июльдән 5 августка кадәр Болгарда “Милләт” белем бирү-сәламәтләндерү балалар лагере эшләячәк. Анда Россия төбәкләреннән, шулай ук Финляндиядән 8-16 яшьтәге балалар һәм яшүсмерләр килер дип көтелә. “Милләт” лагереның максаты — балаларны шәхес итеп тәрбияләү, әхлакый яктан үстерү, аларның сәләтләрен ачу.

7-12 июль көннәрендә Алексеевск районында урнашкан “Биләр” тарихи-археологик музей-тыюлыгы территориясендә “Сәләт” IV халыкара яшьләр уку-укыту форумы уздырыла. Анда фән олимпиадаларында, төрле иҗади конкурсларда, спорт ярышларында катнашып уңышка ирешкән 12-17 яшьләрдәге 5 меңгә якын сәлкеш (сәләтле кеше аларда шулай йөртелә - ред.) катнашыр дип көтелә.

1 июньнән “Электрон балалар бакчасы” автоматлаштырылган мәгълүмат системасында республика балалар бакчаларына 9 мең 334 юллама каралган.
Шулай итеп, 9 меңнән артык ата-ана ТР дәүләт хезмәтләре порталында шәхси кабинетларына кереп “Мәгариф учреждениесенә юнәлдерелгән” дигән статусны күрә ала. Сайланган балалар бакчасына кирәкле документларны әзерли башлау зарур.

ТР Дәүләт Советы депутатлары белем бирү учреждениеләрендә акча җыюны “тыю” төшенчәсеннән баш тартырга, бу таләпне башка сүз белән алмаштырырга кирәк, дип саный. Алар фикеренчә, киң яңгыраш алган бу мәсьәләне хәл итү барышында, беренче чиратта, нәкъ менә “тыю” төшенчәсен әйләнештән төшереп калдырырга кирәк.

Татарстан Республикасы Мәгариф һәм фән министрлыгы юридик хезмәте бушлай юридик ярдәм дәүләт системасы кысаларында һәрдаим  "Болгар радиосы" эфирында мәгариф өлкәсенә караган мәсьәләләр буенча гражданнарга  хокукый  консультацияләр күрсәтә. Чираттагы юридик консультация 2015 елның 1 июлендә 22.00 сәгатьтә "Болгар радиосы"нда "Нокта" тапшыруы кысаларында узачак. Әлеге тапшыру барышында теләге булган һәр граждан өчен татар телендә онлайн режимда бушлай юридик ярдәм алу мөмкинлеге тудырылачак.

Татарстанда "Наркотиксыз тормыш" республикакүләм наркотикларга каршы акция тәмамланды. Ул 26 июньдә билгеләнеп үтүче Халыкара наркотиклар һәм аларның законсыз әйләнешенә каршы көрәш көне уңаеннан оештырылды. Акция 2015 елның 25 маеннан 26 июньгә кадәр үткәрелде. Акция дәвамында 1553 белем бирү оешмасында һәм 158 баларга өстәмә белем бирү оешмасында "Сәламәтлек почмагы" мәгълүмати стендлары яңартылды. 

Бүген Татарстан яшь геологларының II Республика ачык кыр олимпиадасы рәсми рәвештә ачылды. Ике атна дәвамында ул Казан янындагы "Заречье" балалар сәламәтләндерү лагерында узачак.

26 июньдә Түбән Кама нефтехимия һәм нефтьне эшкәртү техникумы базасында профориентация буенча эшчәнлекне камилләштерү мәсьәләләре буенча республикакүләм киңәшмә узды. Чарада Татарстан Республикасы Премьер-министры урынбасары-мәгариф һәм фән министры Энгель Фәттахов катнашты.