ЯҢАЛЫКЛАР

Татарстан Республикасы Мәгариф һәм фән министрлыгы юридик хезмәте бушлай юридик ярдәм дәүләт системасы кысаларында һәрдаим  "Болгар радиосы" эфирында мәгариф өлкәсенә караган мәсьәләләр буенча гражданнарга  хокукый  консультацияләр күрсәтә. Чираттагы юридик консультация 2015 елның 1 июлендә 22.00 сәгатьтә "Болгар радиосы"нда "Нокта" тапшыруы кысаларында узачак. Әлеге тапшыру барышында теләге булган һәр граждан өчен татар телендә онлайн режимда бушлай юридик ярдәм алу мөмкинлеге тудырылачак.

Татарстанда "Наркотиксыз тормыш" республикакүләм наркотикларга каршы акция тәмамланды. Ул 26 июньдә билгеләнеп үтүче Халыкара наркотиклар һәм аларның законсыз әйләнешенә каршы көрәш көне уңаеннан оештырылды. Акция 2015 елның 25 маеннан 26 июньгә кадәр үткәрелде. Акция дәвамында 1553 белем бирү оешмасында һәм 158 баларга өстәмә белем бирү оешмасында "Сәламәтлек почмагы" мәгълүмати стендлары яңартылды. 

Бүген Татарстан яшь геологларының II Республика ачык кыр олимпиадасы рәсми рәвештә ачылды. Ике атна дәвамында ул Казан янындагы "Заречье" балалар сәламәтләндерү лагерында узачак.

26 июньдә Түбән Кама нефтехимия һәм нефтьне эшкәртү техникумы базасында профориентация буенча эшчәнлекне камилләштерү мәсьәләләре буенча республикакүләм киңәшмә узды. Чарада Татарстан Республикасы Премьер-министры урынбасары-мәгариф һәм фән министры Энгель Фәттахов катнашты.

29 июньдә Казанда “Заречье” сәламәтләндерү лагеренда Татарстанның яшь геологлары арасында II республикакүләм ачык кыр олимпиадасының ачылу тантанасы узды. Чарада Татарстан Республикасы Президенты вазыйфаларын вакытлыча башкаручы Рөстәм Миңнеханов, Татарстан Республикасы Премьер-министры урынбасары – мәгариф һәм фән министры Энгель Фәттахов, Росгео компаниясе, Россия Федерациясе табигый ресурслар һәм экология министрлыгы җитәкчелеге һ.б. катнашты.

Казан федераль университетында бакалавриат, специалитет һәм магистратура программалары буенча укырга керергә теләгән абитуриентлардан документлар 19 июньдә кабул ителә башлады. Документларны кабул итү исә түбәндәге көннәрдә төгәлләнә: иҗади һәм (яки) һөнәри юнәлеш буенча өстәмә керү сынаулары нәтиҗәләре буенча укырга керүчеләр өчен – 6 июльдә; КФУ тарафыннан мөстәкыйль уздырыла торган сынаулар нәтиҗәләре буенча укырга керүчеләр өчен – 10 июльдә; БДИ нәтиҗәләре буенча, шулай ук көндезге һәм читтән торып уку бүлекләренә магистратура программасы буенча укырга керүчеләр өчен – 24 июльдә. 30 июльдә вузның рәсми сайтында һәм мәгълүмати стендында укырга керү имтиханнарыннан башка һәм максатчан урыннарга кабул итүчеләрнең исемлеге эленә.

Иртәгә, ягъни 30 июнь көнне, Казанда “Иң яхшы билингваль балалар бакчасы” һәм “Балалар бакчасында белем бирү процессын иң яхшы оештыру” республика конкурслары җиңүчеләрен бүләкләү тантанасы була.

Бүген Казанда Халыклар дуслыгы йортында “Алтын Каләм” – “Золотое Перо” – 2015" XX Республика фестивален ябу тантанасы уздырылды. Искәртеп үтик: фестивальне ТР Журналистлар берлеге, Казан федераль университеты, Республика матбугат һәм массакүләм коммуникацияләр агентлыгы һәм ТР Яшьләр эшләре һәм спорт министрлыгы үткәрә.

13 нче июньнән 17 нче августка кадәр Татарстанның 8 муниципаль районында хәрби-патриотик сменалар үткәрелә.
Сменалар барышында балалар парашют, автомобиль спорты, хәрби-гамәли һәм техник спорт төрләре белән шөгыльләнә.

24 июльдә “Детские Домики” хәйрия фонды Казанның 11нче мәктәп-интернатының “Солнышко” лагерендә ата-ана тәрбиясеннән мәхрүм калган балалар өчен тантаналы рәвештә уен мәйданчыгы ачты. Әлеге мәйданчык лагерьда ял итүче  94  бала өчен зур бүләк булды. Фондның республикабыздагы  координаторлары Юлия Андреева һәм Айгөл  Галимова мәктәп-интернат директоры урынбасары Людмила Федагинага уен мәйданчыгы  сертификатын тапшырды.