ЯҢАЛЫКЛАР

2013 елның 23 декабрендә “Ак Барс” яшьләр үзәгендә Татарстан Республикасында “Мәгариф” өстенлекле милли проектны тормышка ашыру кысаларында Татарстан Республикасының Мәгариф һәм фән министрлыгы тарафыннан сәләтле яшьләрне тәбрикләү тантанасы булып узды. Тантанада Россия һәм регион олимпиадаларында һәм бәйгеләрендә призер һәм җиңүчеләрне, аларны әзерләүче педагогларны бүләкләделәр.

2013 нче елның 20 нче декабрендә Казан шәһәренең 119 нчы номерлы урта мәктәбе базасында Татарстан Республикасы мәгариф бүлеге җитәкчесе урынбасарлары өчен Республикакүләм «Социаль партнерлык шартларында тәртип бозулар һәм җинаять кылуга карата профилактик эшләр оештыру” семинары булып узды.

2013 нче елның 20 нче декабрендә Н.Ә.Гәлләмов исемендәге республиканың махсус гомуми белем бирү мәктәбендә Советлар Союзы Герое Бакый Сибгатуллович Рәхимовның кызы Рәхимә Бакыевна белән очрашу булды. Очрашу вакытында ул әтисенең данлы сугыш һәм хезмәт юлы турында сөйләде, мәктәптә тәрбияләнүчеләргә үз Ватаннарының тугырылыклы гражданнары булып үсүләрен теләде.

Сарман муниципаль районында Математика елына багышланган “Белем алу ысулы буларак эзләнү” исеме астында фәнни–гамәли конференция үтте. Биредә 178 укучы республиканың төрле районнарыннан үз көчләрен сынады: Сарман, Мөслим, Актаныш, Алабуга, Бөгелмә, Чистай, Лениногорск һәм башка төбәкләр.

Классик шагыйрь Хәсән Туфан (1900-1981) туган көнгә багышлап, аның туган төбәге Татарстанның Аксубай районы Иске Кармәт мәктәбендә традицион атналык уздырылган.

Кичә Әлмәттә ТР Президенты Рөстәм Миңнеханов барында ТР Мәгариф һәм фән министрлыгы “Римера” компанияләре төркеме белән 2014-2015 нче елларга һөнәри белем бирү өлкәсендә хезмәттәшлек турында килешү төзеде.
Документны министр Энгель Фәттахов һәм “Римера” генераль директоры Виталий Садыйков имзалады. Әлеге килешүгә кул кую - “Татарстан киләчәге көллияте” проектын тормышка ашыруда ТР һәм “ЧТПЗ” төркеменең уртак эшчәнлегенең дәвамы.

Җирдә туган һәр баланың теге яки бу юнәлештә үз мөмкинлекләре, сәләте була. Яшь кешенең талантын ачу һәм үстерү – мәгариф системасының төп бурычларының берсе. Ә Актаныш гуманитар гимназия-интернаты үз канаты астына җыйган сәләтле балалар белән генә эшләп калмыйча, бөтен республиканың да яшь гыйлем сөючеләренә үзләре ясаган нәни ачышлар белән яшьтәшләрен таныштыру, зур галимнәр белән очрашып, аларның фикерен ишетү мөмкинлеген тудыра.

Сәләтле балаларны ачыклау, аларның интеллектуаль кызыксынуын үстерү максатыннан Кукмараның Иҗади үсеш һәм гуманитар белем бирү үзәге Манзарас мәктәбе базасында 7-8 сыйныф укучылары арасында интеллектуаль чемпионат үткәрде.

Балаларга татар телен мәктәпкәчә яшьтән үк үзләштерүгә соңгы елларда аеруча зур игътибар бирелә. Ниһаять, балалар бакчаларында дәүләт телләрен өйрәтү тиешле дәрәҗәгә куелды. Берничә ел элек эшләнгән яңа заманча программалар бу эшне нәтиҗәле итеп оештырырга мөмкинлек бирде.