ЯҢАЛЫКЛАР

Бүген, 25 декабрьдә Казанда, Татарстан Республика Премьер-министры урынбасары – мәгариф һәм фән министры Энгель Фәттахов катнашында, сәләтле яшьләрне бүләкләү тантанасы узды. РФ Президенты премиясе лауреатларының гомуми күләме быел 164 кешене тәшкил итә.

2014 елның 18-20 декабрендә Казанда мәктәп укучыларының чуаш, мари, мордва һәм удмурт телләре һәм әдәбиятлары буенча республика олимпиадаларының йомгаклау этабы узды. Олимпиадаларда 70тән артык мәктәп укучысы катнашты. Жюри карары буенча чуаш теле һәм әдәбияты буенча олимпиадада Апас, Баулы, Чирмешән районнары һәм Түбән Кама шәһәре укучылары җиңеп чыкты, мари теле һәм әдәбияты буенча – Актаныш һәм Әгерҗе районнары укучылары, мордва теле һәм әдәбияты буенча – Бөгелмә һәм Тәтеш, удмурт теле һәм әдәбияты буенча – Әгерҗе һәм Кукмара районнары укучылары беренчелекне яулады.

2014 елның 24 декабрендә Казан шәһәренең 6нчы номерлы кадет мәктәп-интернаты базасында республикакүләм семинар-киңәшмә узды. Семинарда катнашучылар белем бирү процессы сыйфатын бәяләү, мәктәп эчендәге контроль, документлар тутыру мәсьәләләре хакында фикер алыштылар.

Бүген Казанда IT-паркта “IT-чемпион” республикакүләм конкурсы җиңүчеләре бүләкләнде. Тантанада Татарстан Президенты Рөстәм Миңнеханов, ТР Премьер-министр урынбасары – мәгълүматлаштыру һәм элемтә министры Роман Шәйхетдинов, ТР мәгариф һәм фән министрының беренче урынбасары Андрей Поминов катнашты.

19 декабрьдә РФ Дәүләт Думасында “Хезмәткә һәм оборонага әзер” (ГТО) физкультура-спорт комплексын кертү өлкәсендә Бөтенроссия проектлар конкурсы финалы узды. Кукмараның 4 нче урта мәктәбе физкультура укытучысы Айрат Шаһабиев конкурста 1 нче урынны алды, аның дәресе иң яхшысы дип табылды.

Быел Казанда, төбәкләрдә мәктәпкәчә белем бирү системасын үстерү һәм бакчаларга урнашу чиратларын бетерүдә “юл картасы” чараларын гамәлгә ашыру кысаларында, 30 балалар бакчасы төзелгән (2се былтыргыдан төзелеп бетми калган булган), шуларның 7се – Вознесенское, Залесный, Кадышево, Малые Клыки, Отары, Петровский, Привольный бистәләрендә. Шушы максатларга 2,5 млрд сум акча киткән, аның 30 проценты – федераль бюджеттан, 70ы – республика акчасы. Нәтиҗәдә, мәктәпкәчә яшьтәге балалар өчен 4,2 мең яңа урын булдырылган. Болардан тыш, 15 балалар бакчасында өстәмә 420 урын булдырылган, капиталь ремонт эшләренә 8 млн. сум каралган булган.

28 гыйнварда Рөстәм Абязов җитәкчелегендәге La Primavera камера оркестры икенче хоспис төзүгә ярдәм йөзеннән хәйрия концерты күрсәтәчәк. Концертта танылган җырчылар - Равил Шәрәфиев, Илья Славутский, Эльмира Кәлимуллина катнашачак. Концерттан җыелган акча Казанда хоспис төзүне дәвам итер өчен Анжела Вавилова исемендәге Фондга күчереләчәк.

1000 еллык тарихы булган Алабугада Габдулла Тукайга һәйкәл ачылган көн тарихка кереп калыр. Тантаналы вакыйгада Татарстан Республикасының Габдулла Тукай һәм Муса Җәлил премияләре лауреаты, Россия Федерациясенең һәм ТР атказанган мәдәният хезмәткәре, язучы, шагыйрь Разил Вәлиев, Алабуга муниципаль районы башлыгы урынбасары Зөлфия Сөнгатуллина, ТР атказанган мәдәният хезмәткәре, Татарстан Язучылары берлеге әгъзасы, “Мәйдан” журналы директоры, язучы Вахит Имамов, ТР атказанган мәдәният хезмәткәре, Татарстан Язучылары берлеге рәисенең урынбасары, язучы Факил Сафин, Алабуга районы “Ак сакаллар” берлеге рәисе Рафик Мәхмүтов, Казан (Идел буе) федераль университеты галимнәре, мәдәният һәм сәнгать көллияте укытучылары, милли мәгариф хезмәткәрләре, белем бирү оешмалары җитәкчеләре, татар теле һәм әдәбияты укытучылары, мәктәп укучылары, шәһәр халкы һәм массакүләм матбугат чаралары вәкилләре катнашты.

Ел дәвамында Әлки районы мәктәпләре 84 тонна макулатура җыеп, хәзерләүләр конторасына тапшырганнар. Бу районда һәр укучы уртача 39 килограмм макулатура җыйган дигән сүз. Кәгазь-картон калдыкларын Чиябаш (бер укучыга 131 килограмм), Хлебодаровка (119 килограмм), Әхмәт (81 килограмм) мәктәпләре аеруча күп җыеп тапшырган.