ЯҢАЛЫКЛАР

Кичә ТР Төзелеш, архитектура һәм ТКХ министрлыгында балалар бакчалары төзелеше буенча республика программасын гамәлгә кую буенча киңәшмә узды. Киңәшмәне төзелеш комплексын үстерү идарәсе башлыгы Илшат Гимаев үткәрде.

Татарстанның 4 югары уку йорты Россиянең Топ-100 вузы исемлегенә кергән. Казан дәүләт медицина университеты 35 нче урыннан 31нче урынга күтәрелгән. КФУ былтыргы позициясен саклап калган: ул – 18 нче. Казан илкүләм тикшеренү технологик университеты – КХТИ 54 нче урыннан 62 нчегә, Казан илкүләм тикшеренү техник университеты – КАИ 60 нчы урыннан 63 нчегә төшкән.

1 июньнән “Электрон балалар бакчасы” автоматлаштырылган мәгълүмати системасы аша 2015-2016 елларга мәктәпкәчә мәгариф учреждениеләренә балаларны массакүләм туплау чарасы башланды.

Кичә Казанның “Идея” технопаркында робот техникасы буенча V республика фестивале уздырылды. Анда Татарстанның төрле шәһәрләреннән һәм районнарыннан 60лап укучы катнашты. Роботларның ярышуын карарга һәм аларны ясаган яшь техниклар белән аралашырга исә берничә дистә тамашачы килде.

Халыкара балаларны яклау көне уңаеннан, Зәй районы башкарма комитеты җитәкчесе Разиф Кәримов “Кояшкай” балалар бакчасына килеп, сабыйлар белән аралашты. Биредә, традицияне дәвам итеп, райондагы 30 балалар бакчасы мөдиренә нәниләргә уенчыклар алу өчен сертификатлар тапшырылды.

Лашман мәктәбе укучылары яңа уку елында тәнәфесләрдә теннис уйный алачак. Теннис өстәлен мәктәпкә укучылар җыйган макулатура акчасына алганнар.

Казан ТР Президенты вазифаларын вакытлыча башкаручы Рөстәм Миңнеханов тарафыннан бирелгән 1 млн сум күләмендә грантны олимпиада хәрәкәте үсешенә юнәлтәчәк. Бу хакта бүген Казан мэры Илсур Метшин хәбәр итте.

Бүген, Балаларны яклау көнендә, ТР Дәүләт Киңәшчесе, “Яңарыш” Республика фонды Попечительләр советы рәисе Минтимер Шәймиев Болгар һәм Зөя утрау-шәһәре турында рәсем һәм инша конкурсы җиңүчеләре һәм призерларын бүләкләде. Бүләкләү тантанасы Казан Кремлендә узды. Анда ТР Премьер-министры урынбасары – мәгариф һәм фән министры Энгель Фәттахов, ТР Дәүләт Советы Рәисе урынбасары, “Яңарыш” Республика фонды башкаручы директоры Татьяна Ларионова, ТР Туризм буенча дәүләт комитеты рәисе Сергей Иванов һәм башка рәсми затлар катнашты.